За разлика од периодот во 90-ите години кога исламистите пристигнуваа во Босна за да војуваат на страната на муслиманите против немуслиманското население, сега трендот е обратен, вели Џевад Галијашевиќ за белградски Новости, кој од весникот е претставен како безбедносен стручњак од БиХ, во написот во кој се анализира улогата на муџахедините од поранешна Југославија во исламскиот свет и особено во Срија.
– На Балканот сега младите исламисти се фанатизираат и се праќаат на „воена пракса“ во арапскиот свет, а и да не знаат за чии интереси војуваат. Тоа е страшна закана за безбедноста и иднината на нашиот регион – предупредува Галијашевиќ.
Тој вели дека американскиот и британскиот амбасадор во БиХ ги предупредувале политичарите од Федрацијата на БиХ да ги заладат односите со Иран, а Вашингтон го изгубил трпението по откритието дека властите во Босна издале 200 визи за ирански претприемачи, кои не се занимавале со вообичаените стопански активности. Истовремено, објавено е дека во Сирија загинал уште еден државјанин на БиХ, кој во таа земја стигнал со тура од 52 доброволци и пристапил на единиците на Ен-Нусра. Иако Западот е склон кон сириските „опозиционери“, САД оваа единица заради агресивноста и фанатизмот ја обележија како „терористички клон“ на Ал Каида, истакнува Новости.
– Ен-Нусра е дел од таканаречениот „Балкански Фронт“ на екстремни исламисти. Станува збор за бригада која брои најмалку 5.000 борци од кои на боиштата во Сирија во моментов има околу 1.000 исламисти од територијата на поранешна Југославија. Од нив 500 се од БиХ, а останатите се од Косово, Санџак и Македонија – вели Галијашевиќ и додава оти овие бројки се само она што се знае и докажуваат дека Балканот станал касарна за регрутација и обука на исламисти. Тој додава дека тие се обучуваат и верски и војно во БиХ, на Косово и во Турција од каде што комитети ги упатуваат каде што е потребно.