Скопската противпожарна единица до вечерва успеа да се справи со 18-те пожари кои зафатија делови во и околу градот Скопје. Командантот на противпожарната единица Владимир Симоновски за НоваТВ вечерва изјави дека сеуште активен пожар имале во селото Раовиќ во општина Сарај.
Во гаснењето на ова огнено жариште со две противпожарни возила дејствува скопската противпожарна единица, а се вклучени и две противпожарни возила од „Јасен“ како и една цистерна од општина Сарај која служела за дотур на вода. „ Екипите остануваат на терен до целосно гасење на пожарот“, додаде Симоновски за НоваТВ.
Тој како пожар со најголем потенцијал да предизвика поголема опсност и штети, меѓу денешните, го наведе оној во кругот на фабриката „ Охис“ за кој вели бил сто постотно убеден дека бил намерно предизвикан.
Инаку Симоновски информира и за појавата на лажни дојави. Само денеска кога единицата се соочуваше со толку пожари на терен, добила и 8 лажни дојави за пожар, за места на кои кога отишле противпожарните екипи увиделе дека станува збор за лажна информација.
Симоновски вели, благодарение на новата телефонска централа од 2019-та година, сега се евидентираат сите повици на десетте линии со кои располага централата, што за статични што за мобилни телефони. Така што и овој пат познати се и евидентирани се осумте телефонски броеви од лажните дојави, по што истите ќе бидат пријавени на истражните органи.
Од противпожарната единица на Скопје апелираат никој да не се осмелува лажно да ги навигава противпожарните единици бидејќи е можно додека се упатуваат на лажни места со пожар, некаде да се во прашање минути па и секунди за побрзо да се интервенира за се да не појде во неповрат.