Кениската војска тврди дека ги зазела сите спратови во трговскиот центар во Најрoби, но се уште не се знае дали има скриени терористи, јавува ББЦ. Меѓу терористите е сепак и „белата вдовица“.
Денеска наутро се слушаа експлозии и се гледаше густ чад. Војската се бори со терористите, а новинарите виделе како изнесуваат едно изгорено тело.
Безбедносните сили уапсиле десет терористи, двајца биле фатени на аеродром во обид да избегаат, а тројца се убиени.
Најмалку 62 загинати, а над двесте повредени во терористичкиот напад кој беше изведен од десетина терористи од Ал Шабаб.
Кениската министерка за надворешни работи Амина Мухамед потврди дека меѓу милитантите има двајца или тројца Американци и една Британка. Американците се на возраст од 18 и 19 години, со сомалиско или арапско потекло. Бритаката „ова го направила веќе многу пати“.
Кенискиот Црвен крст извести дека 63 луѓе се уште се водат за исчезнати. Сомалиското исламско движење Ал Шабаб го извело нападот во знак на одмазда заради кениската воена операција во Сомалија.