Трет пат неделава Грција и министрите за финанции од еврозоната не успеаја да се договорат за долгот на Грција. Кредиторите се жалат на предлогот на Грција кој вклучува само зголемување на даноците, но не и намалување на трошоците. Ситуацијата веќе е сериозна со оглед на тоа дека следната недела истекува рокот на Грција да отплати дел од својот долг кон кредиторите, а постои реална опасност грчките банки да не отворат во понеделник. Светските медиуми веќе објавуваат дека на Грција во вторник и се заканува банкрот кој во моментов е се поизвесен. Такви пораки испраќаат и лидерите на ЕУ земјите, а австрискиот канцелар Вернер Фејман дури рече дека „станува јасно дека веројатно ќе треба да и бидат отпишани долговите на Грција“.
Шефицата на ММФ Кристин Лагард се пожали дека грчкиот предлог кој содржи само зголемување на даноците, но не и кратење на трошоците нема да ја придвижи грчката економија, туку само ќе ја оптерети и успори со поголеми давачки.
Германскиот министер за финансии пред триесетина минути ги изнесе своите критики во врска со грчкиот предлог. И тој го критикуваше грчкиот предлог за зголемување на даноците без кратење на јавните трошоци. Во оваа насока и бугарскиот премиер Бојко Борисов, чијашто земја иако не е во еврозоната, тој, сепак, се пожали дека не било во ред сите самити на ЕУ постојано да се однесуваат на проблемите на една држава додавајќи „и јас би сакал да давам поголеми плати ама морам да штедам„.
„Кредиторите направија компромис. Веќе е јасно дека сега е на ред грчката страна да даде свој придонес во решавање на проблемот“, ова утринава го изјави портпаролот на германското министерство за финансии Мартин Јагир кој најави дека во сабота тим преговарачи од нивното министерство одат во Брисел.