Од 1 јануари годинава во Хрватска на сила стапи нов правилник за увоз на вино од трети земји со кој се воведуваат дополнителни услови, т.н. нетарифни бариери за увоз на вино.
Во оваа група на земји е и Македонија, со што цената на македонското вино се зголемува и е помалку конкурентна на тој пазар.
Според новиот правилник меѓудругото се пролонгира периодот на ставање на увезеното вино во промет, односно најмалку 32 дена од царинење до издавањето на дозволата за пуштање во промет. Освен тоа се зголемуваат и барањата за дополнителни анализи и заштита на животната средина. Со ова се зголемува цената на виното. Оваа мерка е донесена за заштита на домашното производство.
Македонските винарски визби веќе побарале од македонските власти да реагираат на овие неочекувани нетрговски бариери. Од македонското Министерство за земјоделство велат дека веќе побарале објаснување за новите одредби и додаваат дека се размислува и за воведување на реципрочни мерки за увезените производи од Хрватска.
-Ние веќе стапивме во контакт со хрватското Министерство и имавме средба со амбасадорката на Хрватска, за да ни објаснат, да видиме за што точно станува збор, по која регулатива е тоа донесено и потоа ќе изградиме став, но откако ќе го слушнеме и официјалниот став од хрватското министерство за земјоделство. Ние сега прво ќе разговараме и ќе им образложиме дека тоа е на штета на договорот за стабилизација и асоцијација, а посебно и за билатералните односи со Хрватска. Ако постои такво нешто во некоја регулатива која што суштински значи со нетарифна бариера пречка за извоз на македонски производи конкретно за виното, тогаш и ние ќе ги преиспитаме нашите позиции и односите со Храватска, доколку има ограничување во однос на трговската размена, вели заменик-министерот за земјоделство Ванчо Костадиновски за Фактор.
Македонија во Хрватска извезува 17 милиони литри годишно или 24,2% од вкупната вредност на извезено вино. Вредноста на овој извоз е 11,2 милиони евра. Хрватска е втора земја после Србија во кои извезуваме македонско флаширано вино и трета после Германија и Србија во кои извезуваме македонско наливно вино.