Американскиот амбасадор Пол Волерс денеска порача дека сите политички субјекти во Република Македонија треба своите активности да ги спроведуваат притоа водејќи сметка за пошироките интереси на државата.

– Нашата позиција е дека кризата, доколку може да се нарече криза, треба да биде надмината за доброто на државата. Сметам дека политичките лидери, како во Владата така и на опозицијата, треба да работат заеднички за доброто на иднината на земјата, на Република Македонија, а не само за своите политички интереси, изјави амбасадорот на САД.

Волерс соопшти дека не би сакал да навлегува во поединости за тоа како да се надминат недоразбирањата и за тоа дали опозицијата треба да се врати на изборите.

-Останува на политичките субјети да го направат тоа, но би повторил дека водилка за сите би требало да бидат интересите на државата и доколку тоа го имаат како императив, ќе биде возможно да се надмине ситуацијата, додаде Волерс.

Американскиот амбасадор престојуваше во посета на Факултетот за туризам и угостителство во Охрид, каде одржа предавање пред студентите за претприемништвото, како и наведе можности за студентска размена и нивно усовршување во САД.