Во цела Македонија синоќа нивото на ПМ10 честичките беше енормно високо и буквално граѓаните дишеа отрови. Нема информации од каде толка степен на загадување од ПМ 10 честичките. Утринава нема толку големо загадување иако, загадувањето е високо во Центар, Карпош, Лисиче, во скопко Миладиновци и Тетово.
Според мерните станици на Министерството за животна средина, синоќа најзагадено било во Битола, со концентрацијата на ПМ10 честички од 995. По Битола, следува Гази Баба во Скопје, каде се измерени 727 ПМ10 честички. Во Куманово ситуацијата беше страшна со измерени 720, а по него е Карпош со 715. Стандардно на листата е мерната станица Ректорат, кај Универзитетот Свети Кирил и Методиј во Скопје со 670. Како и Лисиче каде концентрацијата на отровните ПМ10 честички изнесуваше 719.
Со зелена боја беше обележано само Лазарополе, а денес со оваа боја се обележани и Кочани и Битола. .
Локалните власти, но и ВМРО-ДПМНЕ и СДСМ, по завршување на изборите воопшто не го спомнуваат загадениот воздух. Оваа тема, која е една од најприоритетните за граѓаните, за нивното здравје, беше актуелна единствено за време на изборната кампања како можност за привлекување на некој глас.
Граничните вредности кои се најстрогите правила во законодавството на Европската Унија за нивоата на загадување на воздухот дефинираат дека дневната граница на присутност на ПМ 10 честичките не смее да биде поголема од 40 микрограми на метар кубен.
Овие честички се сметаат за опасни поради нивните милимикронски димензии и формата на мало ноженце со која при вдишувањето, тие навлегуваат длабоко во дишните патишта, а оставаат фатални последици по здравјето на човекот.Но, во Македонија речиси стана секојдневие во дел од градовите ваквите честички и до десетпати да ја надминуваат границата.