Под влијание на студена и не многу влажна воздушна маса, денес и утре времето ќе биде облачно со локални врнежи главно со слаб интензитет. Денес врнежите ќе бидат од снег на планините и на повисоките места, а на пониските места од дожд, но до крајот на денот ќе преминуваат во снег на сите надморски висини, особено во северните делови.
Утре врнежите ќе бидат претежно од снег, освен во пониските подрачја на југот. До утре вечер повеќе врнежи ќе има во планинските региони на северозападот и истокот од земјава, каде се очекува формирање или зголемување на снежната покривка.
Формирање на мала снежна покривка е можно понекаде и во пониските делови на северот од земјава.
Во Скопската котлина не се очекуваат многу врнежи, но ќе бидат претежно од снег, особено во текот на утрешниот ден.
Појава на врнежи ќе има и во вторник, но само во крајните западни делови.
Во останатите региони преку денот ќе има сончеви периоди, ќе дува умерен југозападен ветер, а температурата осетно ќе се зголеми. Поинтензивен влажен бран со врнежи од дожд се очекува во среда доцна попладне, како и
во текот на ноќта кон четврток кога поради нагло заладување врнежите ќе преминуваат во снег.
АМСМ соопштува дека сообраќајот на државните патишта вечерва се одвива по влажни коловози. Врнежи од снег со слаб интензитет во моментов има во Крива Паланка, Попова Шапка, Гостивар, Маврово, Крушево, Буково, Ѓавато, Плетвар, Пресека, Делчево, Павлешенци и Смојмирово. На Страцин врнежите се со среден интензитет. Во Дебар има повремени врнежи од дожд и снег. Овие врнежи во моментов не преставуваат пречка за одвивање на сообраќајот.