Нови врнежи од снег во текот на ноќта имало само во Тетово од што е формирана снежна покривка од 6 сантиметри. Во другите делови врнежите биле од дожд од кои најинтензивни во Дојран каде се наврнати 24 литри на метар квадратен, Берово 22, Пожаране 12, Крива паланка 11, Охрид 6, Штип, Битола и Крушево 8, Ѓуриште 7, Куманово, Тополчани, Демир Капија, Претор, Дебар и Струмица 6, Скопје 5, и Гевгелија, Прилеп и Маврово 4 литри.
Утринските температури се секаде над нулата, освен во Маврово каде се измерени -2 степени и во Тетово и Лазарополе -1 степен. Во Гевгелија утринската температура достигнала 9 степени.
Утрово преовладува променливо облачно со повремени врнежи од дожд, претежно во централните и источните делови. Понекаде дува слаб ветер од променлив правец. Магла има во Скопско.
Во текот на денот ќе се задржи променливо облачно со повремени врнежи од дожд, почести до претпладневните часови и на истокот. На планините ќе има повремен снег. Температурата во интервал од 6 до 12 степени.
АМСМ соопшти дека поради штрајк на грчките земјоделци, граничниот премин Евзони се уште е затворен за сообраќај. Премините Дојран и Меџитлија се отворени за сообраќај.
Сообраќајот на државните патишта се одвива по влажни коловози. Поради појава на магла, видливоста е намалена на 30-50 метри во Павлешенци и 50-100 метри на Кула и на патниот правец Петровец – Хиподром.