Врховниот суд ги прифати жалбите на Јордан Камчев сопственик на „Орка холдинг“ и неговите најблиски соработници, Ненад Јосифовиќ и Цветан Панделески, бизнис-партнер во „Пелистерка“ и управител на земјоделскиот комбинат „Пелагонија“ и им го укина куќниот притвор. Во образложението на Врховниот суд за укинување на мерката куќен притвор за Камчев пишува дека жалбата е прифатена затоа што СЈО немало законска основа да бара да му се определи притвор.
„Согласно член 166 од Законот за кривичната постапка притвор во претходна постапка определува судот по писмен и образложен предлог на овластен тужител и само врз основите што ги навел овластениот тужител во предлогот. Според член 22 од Законот за Јавното обвинителство за гонење на кривични дела
поврзани и кои произлегуваат од содржината на незаконското следење на комуникациите, Јавниот обвинител кој раководи со ова Обвинителство може да покрене обвинение или да нареди запирање на истражна постапка во период не подолг од 18 месеци од денот на преземањето на предметите и материјалите во негова надлежност.
Во оваа смисла, Врховниот суд смета дека одредбата по однос на временскиот лимит за преземање на истражни дејствија и покренување обвинение од член 22 од Законот за СЈО, треба да се толкува во корист на обвинетиот што недвосмислено произлегува од неспорното Правно начело in dubio pro reo, цврсто востановено во казненото право и Меѓународното право за човековите права, што не навлегува во повреда на принципот владеење на правото.
Според правното мислење кое го утврдија врховните судии на општа седница, СЈО е неовластен тужител и не може да покренува обвиненија, да отвора истраги и презема предмети од редовното обвинителство 18 месеци по преземањето на бомбите.
Во случајот „Империја”, осомничени се Орце Камчев, Сашо Мијалков и 11 други лица, меѓу другото и за измама и за перење пари.
Откако Апелацискиот суд го потврди куќниот притвор за поранешниот шеф на тајната полиција, неговите адвокати подготвуваат жалба до врховните судии, за нивниот клиент да се брани од слобода.