Имајќи ја поддршката на родителите, наставниците и граѓаните, средношколците денеска во 17 часот пред Министерството за образование и наука ќе го одржат вториот собир на кој ќе го искажат револтот од реформите во образованието и незаинтересираниот однос од надлежните.
На вчерашниот собир, тие со свирежи и скандирања „Вас да ве тестираме“, ги оставија училишните униформи, заедно со црни кеси пред Министерството, за како што велат тие симболично да покажат дека „реформите се ѓубре“.
Тие се децидни дека нема да се откажат од барањата се додека не се прифатат нивните барања и не остварат нова средба со претставниците на надлежното министерство.
Нивните барања се вистински реформи на образованието по мерка на младите. Враќање на стариот концепт на матура и мирување на екстерното тестирање.
Досега околу 10 илјади граѓани се потпишаа на петицијата за поддршка за средношколците. Средношколците повеќе од еден месец ја бојкотираат формалната настава во училиштата, а веќе втора недела спијат под отворено небо во паркот наспроти МОН. Покрај учениците и наставници и родителите формираа Родителски пленум и одлучија целосно да застанат зад своите деца, сметајќи дека нивните аргументи се издржани.