Фондот за здравствено осигурување цел месец носи одлуки, издава и процесуира документи и решенија иако на едниот од двајцата директори , Орхан Рамадани му е истечен мандатот уште во мај, дознава НОВА. На Рамадани му е истечен мандатот на 26 мај, а Управниот одбор на ФЗОМ не отвориле конкурс за избор на директор.
За тоа време биле потпишувани многу документи, се носеле одлуки и решенија, меѓу кои и за лекување во странство и во приватните болници на кои стои и потписот на Рамадани. Од документите кои се достапни јавно може да се види дека на 10 јуни е донесена одлука за формирање на Првостепена и Второстепена комисија за лекување во странство, од каде се сменети претседателите и повеќето членови при што се назначени нови.
Со ова, фактички сите решенија вклучувајќи ги и одлуките за назначување на нови членови на двете комисии се незаконски, велат извори за НОВА добро упатени во проблематиката.
Како ФЗОМ можел да се доведе во оваа ситуација да се потпишуваат и носат решенија кои се спротивни на Законот за здравствено осигурување, нема конкретен одговор во Републичкиот Фонд за здравство. НОВА го контактираше другиот директор на ФЗОМ, Ден Дончев за го прашаме како се потпишувал и тој на истите документи каде што има врзан потпис со Орхан Рамадани, но тој не сакаше да коментира за случајот.
Во Управниот одбор на ФЗОМ, кои биле должни да распишат оглас за избор на нов директор еден месец пред истек на мандатот, се правдаат дека чекаат Владата преку Министерството за здравство да дадат инструкции дали Рамадани ќе биде в.д или ќе се распише оглас за избор на нов директор.
„Го консултираме директорот Рамадани и тој вели дека никаде во Решението не стои до кога му истекува мандатот. Документи потпишувал бидејќи никаде во Решението не му пишува до кога треба да биде директор. Ние како Управен одбор не добивме досега никакви инструкции и чекаме Владата преку Министерството за здравство да одлучат дали треба да отвориме оглас или Рамадани ќе остане в.д директор“, одговорија за НОВА во Управниот одбор на ФЗОМ.
Орхан Рамадани беше именуван за директор на ФЗОМ во 2015 година од страна на претходната Влада, а одлуката стапи на сила на 26 мај 2015 година, откако излезе во Службен весник. Претходно, Рамадани три месеци ја извршуваше функцијата в.д директор на ФЗОМ.