Очекувам преговорите за членство во ЕУ со Северна Македонија и Албанија да бидат отворени во март, освен ако не се чека Самитот во Загреб во мај, изјави во Париз српскиот претседател Александар Вучиќ по средбата со неговиот француски колега Емануел Макрон, коментирајќи ги барањата на одредени земји за повторно ставање на гласање на одлуката за старт на пристапните преговорите со двете земји.
– Тие ќе го сторат тоа во март, бидејќи се плашат од резултатите од изборите на 12 април во Скопје. Тие не сакаат да бидат виновни за поразот на некој кому му ветиле нешто за нешто што тој направил, изјави Вучиќ, пренесува МИА од Белград.
Српскиот претседател по синоќешната средба во Париз со Макрон истакна дека иницијативата за укинување на бариерите за слободно движење на стоки, услуги, капитал и луѓе меѓу Србија, Северна Македонија и Албанија е поважна од повлекувањето на признавањето на Косово.
На прашањето дали добил поддршка од Макрон за проектот „Мал Шенген“ и дали очекува притисок поради идејата, Вучиќ одговори дека оваа иницијативата нема да ја нарече со тоа име, иако веќе е влезена во секојдневна употреба, бидејќи тој назив „вознемирува некои луѓе, а и заради географската одредница“.
– Никој не може да каже дека таа иницијативата може некому да му пречи, затоа што не постои рационална причина за тоа. Иницијативата е поддржана од САД и Макрон тоа ќе го стори јавно. Но, на некои земји може да им се каже да речат дека се против тоа заради нешто, затоа што сфатиле дека ја земаме судбина во свои раце и самите ги решаваме сопствените проблеми, истакна Вучиќ.
Тој нагласи дека ни на членови на неговото семејство не може да им ја објаснам важноста на оваа иницијатива. – Постариот син смета дека е позначајно повлекувањето на признавањето на независноста на Косово, а тоа не е ни близу до тоа, рече Вучиќ.
Српскиот претседател истакна дека е неопходно „да се стави на видело“ европската иднина на регионот, додавајќи дека започнувањето преговори и потоа задржување десет години во отворање на поглавјата, само доведува до зголемување на бројот на противници на ЕУ.
– Макрон, за разлика од другите, ја кажува вистината и не е лицемерен, додаде тој.
Претседателот Стево Пендаровски денеска на маргините на Мировниот самит во Париз се сретна со Макрон. На 22 овој месец, тој ќе оди во официјална посета на Србиуја каде ќе има средба со Вучиќ.