Заменик помошникот државен секретар на САД за Европа и Азија Брајан Хојт Ји, кој денеска престојува во посета на Република Македонија, претпладнето во Американската амбасада имаше одделни средби со лидерите на ДУИ и на ДПА, Али Ахмети и Мендух Тачи.
– Се согласивме дека овие избори мора да бидат кредибилни, да не бидат оспорени од ниту една страна, да ги исполнат сите стандарди и да не бидат оспорени ниту локално, ниту меѓународно. Разговаравме и за чекорите кои Македонија ќе треба да ги преземе во правец на ангажманите што ни претстојат за Самитот на НАТО во јули за да имаме поголеми очекувања, изјави Ахмети по средбата.
Како што рече, не било разговарано околу повторно поместување на изборите, туку за исполнување на задачите од страна на сите институции како што се политичките партии, ДИК и други, изборите да бидат кредибилни, а политичките партии, подвлече, да си ја работат својата работа, да нема притисок и заплашување кон гласачите.
Ахмети додаде дека очекува кредибилни избори и дека тоа ќе бидат најмониторирани избори во Република Македонија од нејзината независност.
На новинарско прашање, дали треба да се исполнат сите услови вклучувајќи го и договорот за медиумите, Ахмети нагласи дека се разговара околу многу прашања, а САД, како што рече, беа и остануваат наши пријатели – помагаа во минатото, помагаат и сега.
За тоа дали ќе се појави и кој е неговиот став за тоа што е повикан денеска во СЈО во врска со случајот „Космос“, Ахмети одговори дека за тоа „ќе разговара таму“.
Протестите најавени од ДУИ за денеска, за лидерот на оваа партија Ахмети се „столб на демократијата“.
Лидерот на ДПА Тачи по средбата со Хојт Ји рече дека конкретната порака е дека САД се најголемиот поддржувач и сојузник на Македонија, но треба да сфатиме оти ние треба на нив да им дадеме силен аргумент за тие да се борат што побрзо да станеме членка на НАТО. Нема посилен аргумент, вели Тачи, од придонесот претстојните избори да бидат фер и демократски и да се исполнат условите предвидени од договорите од 2 јуни и 15 јули.
– Од моја страна имаше скептицизам дека уште не е ништо направено за да се подобрат условите. Ние како ДПА ќе продолжиме да даваме конструктивен придонес во овој процес. Многу работи во овој процес не ми се допаѓаат, но мислам дека тоа не е толку важно бидејќи ние сме стриктно ориентирани дека Македонија треба да стане членка на НАТО и на ЕУ и друга алтернатива тука не може да функционира, изјави Тачи.
Одговарајќи на новинарско прашање во врска со поставувањето на крстот и споменикот – двоглав орел, Тачи рече дека граѓаните не треба да не паѓаат на тие провокации.
– Тоа е веќе видена игра на двајцата партнери секогаш пред избори да се спечали некој политички поен, а тоа не е добро. Пораката до ДУИ е дека сите овие проблеми би требало да се решаваат во институциите на системот и тука на пример да донесат одлука албанското знаме да се употреби во Парламентот, а не на улица, рече Тачи.
На прашањето дали активностите на ВМРО-ДПМНЕ и на ДУИ можат да предизвикаат подлабока безбедносна криза во земјава, лидерот на ДПА одговори дека не верува во тоа, бидејќи сме под силен мониторинг и на секој ќе му се стават поените било негативни, било позитивни и тоа мора сите да го сфатат.