Од српскиот министер за здравство Златибор Лончар и побарав да ми даде список од наши граѓани кои се вакцинирале во Србија. Списокот ни е потребен оти планираме нашите сограѓани кои веќе се вакцинирале во Србија да се ревакцинираат во Македонија, информираше денеска министерот за здравство Венко Филипче.
„Утрово разговарав со српскиот колега Лончар и побарав од него да ми даде список од наши граѓани кои се вакцинирале во Србија. Тие што се вакцинирале таму, планирано е да се ревакцинираат дома. Апсолутно ќе имаме доволно дози за ревакцинација. Денеска завршуваат сите административни работи во Агенцијата за лекови во однос на дозволата за вакцините на „АстраЗенека“ и веќе од среда ќе започне процесот на имунизација. Вкупно 20.000 граѓани ќе добијат термини за вакцинација. Јас нема сега да се вакцинирам, ќе почекам да стигне поголема доза. А кога ќе имаме, ќе се вакцинирам со „АстраЗенека“ со цел да докажам дека е безбедна вакцината. Ги уверувам граѓаните дека сите вакцини се проверени и безбедни“, рече Филипче.
Според српските здравствени власти, само викендов во Србија биле вакцинирани 22 илјади странски државјани, од БиХ, Црна Гора, Македонија…