Интеграцијата на земјава во ЕУ и во НАТО е загрозена поради авторитарниот курс на Владата, вели за „Дојче Веле“ Клаус Бремих, пратеник на ЦДУ, кој присуствуваше на денешната седница во Бундестагот за Македонија.
Инаку, ЦДУ е владејачката партија во Германија на канцеларката Ангела Меркел, која припаѓа на семејството на европски десничарски политички сили и важи за сестринска партија на ВМРО-ДПМНЕ.
Како што јавува „Дојче Веле“ Комисијата за надворешна политика на германскиот Бундестаг денеска зад затворени врати расправала за политичката криза во Македонија. Пратеникот на владејачката конзервативна ЦДУ во германскиот Бундестаг Клаус Бремих во разговор за „Дојче веле“ ги пренесува своите и оценките изнесени на денешната седница за состојбата во земјава.
Бремих потенцира дека кај нив постојано доаѓаат извештаи за силно корумпирани структури од Македонија и дека овие сознанија биле презентирани и на денешната седница на Комисијата за надворешна политика на Бундестагот.
На прашањето дали според пратеникот е загрозена и ЕУ перспективата на земјава или ваквиот развој е последица на закочените процеси поради грчкото вето, Бремих вели дека авторитарниот курс на Владата ја загрозува интеграцијата на земјата во ЕУ и НАТО.
Целиот разговор со германскиот претеник можете да го прочитата на „Дојче веле“.