Министерката за труд и социјална политика, Јованка Тренчевска во текот на вчерашната посета на Пробиштип, рече дека само за 100 дена се издадени осум решенија за отворање на нови детски градинки.
„За Владата и Министерството за труд и социјална политика, вложувањето во раниот детски развој е приоритет. Тоа го потврдуваат 69 детски градинки отворени од 2017 година до денес и опфат на околу 4.300 деца. До крајот на 2022 година, предвидено е отворање на нови 13 градинки со вкупен капацитет за 1.360 деца, а 15 градинки кои се во тек, се планирани да се отворат во 2023 година со вкупен капацитет за 1.905 деца. За 100 дена од оваа Влада издадени се 8 решенија за отворање на нови детски градинки,“ рече Тренчевска.
Таа посочи дека покрај капиталните инвестиции, Министерството инвестира и во предучилишното згрижување и воспитание преку зајакнување на компетенциите на стручниот кадар во нив.
Министерката присуствуваше на одбележување на патрониот празник на образовната установа „Гоце Делчев“, во чии рамки функционираат 4 детски градинки со вкупен капацитет од околу 420 деца. Таа притоа рече дека со доградбата на детската градинка на објектот Срничка, како дел од Проектот за подобрување на социјалните услуги, опфатот на деца во процесот на згрижување и воспитание е зголемен за дополнителни 74 деца. Со ова бројката на деца од досегашните 125 се зголемува на околу 200 деца. Овој дел од објектот треба да биде достапен за нови деца веќе од септември оваа година.