Казна затвор во траење од три до осум години за вршење на тортура предвидува Кривичниот законик на Р. Македонија. Доколку при тоа настапи и тешка телесна повреда или други тешки последици за оштетениот, сторителот ќе се казни со затвор од најмалку четири години. Во член 142 во Кривичниот законик ова дело е дефинирано како „Мачење и друго сурово, нечовечно или понижувачко постапување и казнување“ и гласи:
(1) Тој што во вршењето на службата, како и тој што наведен од службено лице или врз основа на негова согласност, ќе употреби сила, закана или друго недопуштено средство или недопуштен начин со намера да изнуди признание или некоја друга изјава од обвинетиот, сведокот, вештакот или друго лице, или ќе предизвика кај друг тешко телесно или душевно страдање за да го казни за кривично дело што го сторило или за што е осомничен тој или друго лице, или за да го заплаши или да го присили на откажување од некое негово право, или ќе предизвика такво страдање поради каков било облик на дискриминација, ќе се казни со затвор од три до осум години.
(2) Ако поради делото од став 1. настапи тешка телесна повреда или други особено тешки последици за оштетениот, сторителот ќе се казни со затвор најмалку четири години.
Според Конвенцијата на ОН против тортура и други свирепи, нечовечки и понижувачки постапки постапки или казни од 1984 година, постојат три основни елементи со кои се дефинира тортурата:
1. Намерно предизвикување на душевна и физичка болка.
2. Постоење на определена цел која може да биде добивање на одередно известување или признание, да се казни за одредено дело, да се заплаши или да се изврши притисок.
3. Извршување од страна на службено лице или друго лице кое дејствува во службено својство.
СЈО денеска објави дека започнува нова истрага под името „Тортура“, која се однесува на апсењето на лидерот на партијата Обединети за Македонија и екс министер за внатрешни работи Љубе Бошковски.
Во случајот „Тортура“има седум осомничени од кои првоосомничен е поранешниот директор на Управата за контраразунавање Сашо Мијалков.