Извршен е увид од јавниот обвинител и полицијата и веќе се трага по виновникот или виновниците за оваа хаварија. Нивната „операција“ е најверојатно и снимена со надзорна  камера.

Голема трагедија била избегната утринава во тетовската болница каде некој ги оштетил споредните цевки од системот за централен дотур на кислород, кои што го снабдуваат ургентно-дијагностичкиот центар.  Но, таму за среќа немало пациенти и тоа е позитивната околност. Снабдувањето со кислород на пациентите во ковид-одделенијата пак било преку главната цевка и немало застој. Извршен е увид од јавниот обвинител и полицијата и веќе се трага по виновникот или виновниците за оваа хаварија. Нивната „операција“ е најверојатно и снимена со надзорна  камера.

Д-р Гзим Нуредини, координатор на ковид центарот во болницата изјави дека има и камери во просторијата каде биле откорнати цевките.

Очекуваме сторителите на ова дело да бидат фатени и казнети, гледаме дека за жал има и такви луѓе кои сакаат да направат вакви лоши работи. Се забележува  дека некој удирал со метален предмет врз цевките, едната ја пресекол, додека другата е свиткана. Ќе беше голема хаварија да успеаја во тоа, сите пациенти во тој оддел се зависни од кислород! За среќа, не успеале во намерата и најважно е што немавме последици по пациентите – вели д-р Нуредини и додава дека оштетените цевки биле заменети со нови и доводот на кислород сега функционира.  

Во врска со тоа дали ќе го засили надзорот врз оваа просторија, тој објаснува:

– Тие биле и досега обезбедени – се наоѓаат на височина од околу три метра и тоа во посебна просторија која има и ограда. Освен тоа има и техничка служба со одговорни лица, но и камери има просторијата и верувам дека е снимен овој вандалски чин, сосе сторителот! Но ќе треба, така да кажам, „похерметички“ да ја обезбедиме оваа просторија, а планираме да го засилиме и обезбедувањето со 24-часовна дежурна служба, вели д-р Нуредини.

А дали станува збор за кражба на бакарни цевки, со цел нивна продажба или друг мотив е во прашање, испитуваат Јавното обвинителство и полицијата, кои веќе извршиле увид.

– Со употреба на физичка сила биле оштетени две бакарни цевки со различна големина. Едната цевка за компримиран воздух била скината, а втората, којашто е за азотен-оксид била свиткана. Набрзо по пријавата, екипа на Секторот за внатрешни работи Тетово, во координација со Јавен обвинител, извршила  комплетен увид. Оштетувања се фото-документирани и крим-технички обработени. Случајот се расчистува и документира, изјави Марјан Јосифоски, портпарол на СВР Тетово.

Неодамна и во „Арабати Баба Теќе“ некој се обидел да украде дел од трансформаторот, но веднаш се премислил, зашто истиот бил вклучен.

Љубица Балабан