Владејачката ВМРО-ДПМНЕ попладнево со соопштение реагираше на денешната прес-конференција на лидерот на СДСМ, Зоран Заев на која тој повторно пласираше снимки поврзани со рушењето на „Космос“ и со фамозните плацеви на Водно.
– Заев продолжува да го тера своето деструктивно сценарио, и без поддршка од граѓаните продолжува да објавува креирани, сечени и монтирани материјали. Наводите кои се обиде Зоран Заев да ги конструира во денешната прес конференција се чиста манипулација и невистина. Бомбастичните најави за креирани разговори се само доказ дека и тој е свесен за своите манипулации. Го потсетуваме дека за истите конструкции беше испратено официјално соопштение од страна на Владата, во кое јасно беше одговорено дека Никола Груевски не поседува никаков друг имот надвор од оној кој е пријавен во неговиот анкетен лист, а кој е и јавно објавен. Ваквите наводи на Заев и тогаш и сега се целосно измислени и невистинити, реагира партијата.
Оттаму велат дека веќе и самиот Заев е свесен дека неговата деструктивна политика не поминува ниту кај неговото членство, а уште помалку кај граѓаните, па продолужва да се дозаглавува во сопствените манипулации.
– Тој многупати досега покажал дека материјалите кои ги објавувал се сечени, лепени, прилепувани, монтирани и ставани во манипулативен контекст. Впрочем тоа СДСМ го призна и во свое партиско соопштение. Неговиот обид да се добере до власт без поддршка од народот, без избори, со помош на странски центри и соработници, веќе е прочитан. Очигледно дека Зоран Заев станува се понервозен кога од сите страни се потврдува неговата соработка со надворешни центри кои не и мислат добро на Македонија, кога постојат признанија од лицата кои учествувале во нечесниот чин, а кои директно соработувале со Верушевски, и на крајот на краиштата кога самите граѓани му покажуваат дека ваквите ниски обиди не се прифатливи за нив, стои во денешното соопштение на ВМРО-ДПМНЕ.