Нашата земја беше изложена на дезинформации кои во одредени периоди добиваа на интензитет, рече владиниот национален координатор, Марјан Забрчанец на панелот во Блед, кој се обрати на темата „Во борба против дезинформациите со информации: Обезбедување безбедност преку факти“.
Тој за примери на дезинформации ги наведе случаите со уставните промени и референдумот, договорот од Преспа, изборните периоди и за време на целиот период на спроведување на реформските процеси во земјата.
Според Забрчанец, ширењето на дезинформации е постојано нагласено и во однос на мигрантските кризи, особено во последниот период во однос на кризата во Авганистан и со бегалците од оваа земја како хуманитарната криза.
Во однос на пандемијата со Ковид – 19, според Забрчанец лажните вести и дезинформации и натаму ги има. А, и во период кога во земјава се спроведува вакцинацијата наведува дека се опструира со дезинформации.
– Дезинформациите и лажните вести се сериозна закана за демократијата и демократските процеси и за справување со овие појави Владата на Република Северна Македонија креираше акциски план со насоки за препознавање и за демистификација и ги покани сите засегнати страни да се вклучат во постојаното усовршување на планот за успешна и ефикасна борба против дезинформациите, рече Забрчанец.
Тој посебно нагласи дека во борбата со дезинформациите е неопходна проактивност и активна транспарентност наместо само реактивна и дефанзивна стратегија заради фактот што на тој начин оние што ги продуцираат лажните информации ќе бидат постојано во предност.
– Треба да создадеме услови за промена на играта. Владите, граѓанските и меѓународните организации кои се обединети во заедничката борба против дезинформациите, наместо да живеат во страв, треба да бидат проактивни во промоцијата на демократските вредности и со активна транспарентност да ги елиминираат влијанијата на дезинформациите. Кога граѓаните ги имаат на увид сите факти, на креаторите на дезинформации ќе им биде многу потешко да манипулираат. Тие информации најтранспарентно треба да се обезбедат, да се продуцираат, да се публикуваат и промовираат, потенцираше Забрчанец.
Тој додаде дека со дополнителна интензивна меѓусекторска соработка, како и со стратегиска програма за медиумска писменост се создаваат услови за заедничка и ефикасна промоција на демократските вредности како противтежа на дезинформациите.
Националниот координатор за стратешки комуникации во Владата нагласи и дека се од исклучителна важност соработката и вмрежувањето за споделување искуства и за дефинирање на клучните заеднички активности за борба против дезинформациите меѓу сите засегнати страни во земјата, но и во регионот,
Во завршницата на панелот Забрчанец рече дека информациската војна меѓу поддржувачите и противниците на демократијата ќе ја добијат оние кои имаат јасен концепт и јасна визија за иднината и за развојот на општеството.
Панелот си постави за цел да одговори што прави ЕУ на темата борба против дезинформациите, како со оваа појава се справуваат одделните држави и граѓанските организации и како борбата против дезинформациите со информации и обезбедување безбедност преку факти рефлектира на иднината на Европа.