Социјалдемократскиот Сојуз на Македонија нема да дозволи Никола Груевски и ВМРО ДПМНЕ со институционално насилство да ја превземат контролата во Општина Центар. По неуспехот со изборна тортура, сега се во нов поход. Преку монтиран политички процес да ја поништат јасно изразената волја на граѓаните, изјави на денешната прес-конференција претседателот на СДСМ, Зоран Заев.
Тој вели, процесот против претседателот на Советот на општина Центар, е создаден поради тоа што ВМРО ДПМНЕ не може да ја поднесе храброста, единството и решеноста на советничката група предводена од СДСМ и градоначалникот на Општина Центар да ги откријат и објават документите за најголемиот грабеж на народни пари во историјата на Македонија.
Заев изрази сомнеж дека монструозниот план, за како што го нарече, за одмазда не завршува со Шиповиќ. Мора да страда и неговото семејство и блиските соработници.
СДСМ, вели Заев, апелира до судот да ја укине мерката притвор за Шиповиќ и неговите соработници, но да продолжи истрагата, бидејќи притворот претставува казна за Шиповиќ и неговото семејство.
Според Заев, фирмата „Машинопромет“ е предмет на судски спорови повеќе од 10 години, и дека Шиповиќ не можел да учествува во евентуални финансиски малверзации.
„Машинопромет“ не е причината за истрагата и изрекувањето на мерката притвор за Шиповиќ. Причината е намерата на власта да ја блокира работата на Општината. Да ја оневозможи Општина Центар во истрагата за криминалот поврзан со Скопје 2014, да ги поништи незаконски донесените урбанистички планови, да ја спречи реализацијата на сомнителните градби во Центар“, вели Заев.
Според него, во случајот Шиповиќ судот нема аргументи за изрекување мерка притвор. Тој напомена дека претседателот на Советот на општина Центар нема намера да избега од земјава.
– Работа на судот е да ја продолжи истрагата. Судот има на располагање механизми да обезбеди гаранција за присуство на осомничениот. Залог на имот, одземање на патната исправа, наложување на обвинетиот најмалку еднаш неделно да се појавува во судот…и ред други мерки, надополни претседателот на СДСМ.
Тој потенцираше дека СДСМ со сите демократски механизми ќе се спротивстави на агресијата на власта. Доколку мерката притвор за Шиповиќ не биде укината, ќе следува првична реакција:
СДСМ го стави во мирување учеството во работата на собраниската комисија за имплементирање на заклучоците од Комисијата за 24-ти Декември.
Градоначалниците на СДСМ ќе го стават во мирување своето членство и активности во ЗЕЛС.
Советниците на СДСМ во сите совети на општини во Македонија во знак на солидарност со колегите од Центар, нема да присуствуваат на првата наредна седница на Советот на нивната матична Општина, објасни Заев.
Тој го повика Премиерот и владејачката партија на разум, во спротивно, изјави Заев, тие ќе ја сносат целата одговорност за развојот на настаните и состојбите во државава, како и за нарушувањето на меѓународниот углед на Македонија.