Средбата на премиерот Зоран Заев со претседателот на Европската комисија (ЕК) Жан-Клод Јункер е закажана за 16,30 часот денес во Брисел. Ова е прва средба на македонски премиер со шефот на извршното тело на ЕУ во последниве 8 осум години.
Откако Јункер изјави дека постои можност Србија и Црна Гора да станат членки на ЕУ во 2025 година, Заев одлучи да ја пренесе и пораката на Македонија која гласи – и ние заслужуваме да се најдеме во друштвото на Белград и Подгорица, да добиеме барем датум за старт на преговори за членство во 2018 година затоа што Македонија е најуспешната приказна на Балканот во последните години.
Србија и Црна Гора веќе преговараат со ЕУ а Јункер треба да ги чуе и македонските аргументи што Заев ги пренесе на својот ФБ профил:
– Дојдовме со аргументи дека се создадени позитивни случувања по долгиот, одложен процес на нашите интеграции во ЕУ. Продолжуваме да даваме резултати со силна посветеност и несомнена политичка волја, во интерес на граѓаните. Тука сме да ја покажеме подготвеноста на Република Македонија и да ја убедиме Европската комисија да донесе одлука за отпочнување на преговори за нашата земја во првата половина од 2018 година, наведува Заев.
– Со новата власт Македонија има силни аргументи со кои може да се претстави пред Јункер како договорот со Бугарија, разбивањето на мразот со Грција и вистинската желба проблемот со името да се реши но пред се со судските реформи и реформата на разузнавачките служби. Некои од нив се започнати, јавниот обвинител ќе биде именуван наскоро, реформата во УБК добро напредува а некои реформи се очекуваат во наредните два месеци како на пример Законот за заштитени сведоци, укинување на Советот на верификација на факти во судството и реформата на Судскиот совет, вели европски извор за НОВА.
Нашиот извор вели дека се уште има проблеми па така од Македонија се очекува да внимава на критериумите за именување на судии и да не тргне по патот на претоходната влада. Именуваните судии треба да доаѓаат од Судската академија и мора да се избегнат партиски именувања, додава изворот.
И покрај ентузијазмот на Комисијата на Јункер за нов елан во односите со земјите од Балканот, потребно е многу повеќе труд за да се убедат земјите членки. Така, Франција, Германија, Холандија, Данска, Белгија и Луксембург воопшто не се сигурни дека ќе кренат палец нагоре за стратегијата на ЕК за Балканот. Според нашиот извор, само силни реформи можат да ги убедат во тоа.
Освен со Јункер, Заев денес ќе се сретне со претседателот на Европскиот парламент Антонио Тајани, со високата претставничка на ЕУ за надворешна политика и безбедност Федерика Могерини и со еврокомесарот за соседска политика и проширување Јоханес Хан.
– Со претседателот на Европскиот парламент Антонио Тајани, претседателот на Европската комисија Жан Клод Јункер и еврокомесарите Федерика Могерини и Јоханес Хан уште еднаш ќе ги потврдиме нашите партнерски односи на патот на исполнување на стратешката цел Република Македонија да стане членка на ЕУ, напиша премиерот Зоран Заев на својот фејсбук профил.
Македонскиот премиер ќе учествува и на трибината „Македонија по шарената револуција: Нови можности за успешно пристапување во ЕУ“, во организација на Фондацијата Фридрих Еберт во Брисел.
Во делегацијата што ја предводи премиерот Заев се и вицепремиерот Бујар Османи, министерот за надворешни работи Никола Димитров, министерот за транспорт и врски Горан Сугаревски и генералниот секретар на Владата Драги Рашковски.