По средбата со бугарскиот премиер Бојко Босиров, лидерот на СДСМ Зоран Заев на новинарско прашање поврзано со случајот Смилковско езеро, истакна дека во многу брз временски период и доказите за овој случај ќе бидат споделени со јавноста.
-Знаете дека Смилковското Езеро е еден од пакетите на докази коишто и граѓаните на Македонија ги чекаат. Ние се трудиме да бидеме внимателни со објавувањето на тие докази коишто ги поседуваме. Зошто? Заради тоа што е чувствителна состојбата во Република Македонија после настаните во Куманово. Но, ветивме на граѓаните дека целата вистина ќе ја споделиме, така што во многу брз временски период и доказите за Смилковското Езеро ќе бидат споделени со јавноста, рече Заев.
Заев истакна дека мора да се изнајде начин за излез од кризата по мирен пат.
-Со отварањето на кризата во Македонија се случија и настаните во Куманово, кадешто загинаа 8 припадници на нашите специјални единици и загинаа 10 припадници на терористичките групи, во јадрото на вториот по големина град во Република Македонија, Куманово. Тоа веднаш го отвори проблемот како регионален. Нормално овде на Балканскиот полуостров, грижата е присутна не само во Македонија туку и кај нашите соседи. Бугарија е голем пријател на Република Македонија.
Јас денеска ја искористив токму таа прилика да ги споделам информациите и со претседателот на Владата, првиот министер, г-динот Борисов, но и со заменик претседателот на мојата сестринска партија БСП, на еден демократски начин да ги запознаеме со деталите. Начинот за излез од кризата во Македонија е согласно европската традиција и пракса.
Не сакаме да ги повтараме сценаријата коишто ги видовме во Украина или како што се случуваа порано во Србија. Во 21 век, втора декада, по мирен начин, без насилство мора да се најдат решенија. Ние веќе започнавме разговори во Македонија. Во вторник е комесарот за проширување Хан, во Македонија. Заедно ќе се обидеме да навлеземе во преговори. Нашето барање е слично по примерот на Бугарија да создадеме техничка Влада, без влијание на двете најголеми партии, од опозицијата, или власта, на демократски начин, во соодветен период од 6 до 9 месеци, да ја подготви Македонија, со Изборен законик, со Избирачкиот список, со Антикорупциската комисија, Државната изборна комисија и многу други слабости коишто системот ги има, и да излеземе на фер, демократски и регуларни избори.
Народот е тој којшто ја дава власта и народот е тој којшто ќе одлучи во кој правец да се движи Македонија и кој да ја води. Но, ред е политичарите после демократски и фер избори да си подадат рака и заедно да ја градат иднината на својата земја, рече тој.