Дождот не ги спречил жителите на беровско Русиново да излезат во голем број и да го пречекаат претседателот на СДСМ, Зоран Заев кој в очи на христијанскиот празник Велигден беше во посета на населените места во Малешевијата.
Во обраќањето пред нив претседателот на СДСМ презентирал повеќе мерки од програмата на СДСМ кои ќе допринесат за вистински промени во Македонија, и кои ќе го подобрат животниот стандард на сите граѓани, информираат од СДСМ.
Лидерот на најголемата опозициска партија посочил дека во секоја нормална демократска држава, кога ќе се обелодени криминален скандал директно поврзан со премиерот на државата тој веднаш се повлекува од политичката сцена, а институциите на државата ги превземаат сите мерки за негово расчистување.
„Снимките покажуваат огромен скандал. Не само што Груевски примил 1,5 милион евра во кеш туку и затаил данок со што ја оштетил и државата, буџетот, граѓаните. Никола Груевски треба да замине од политичката сцена. Секој политичар во светот, ако се фати во ваков криминал, веднаш самиот си заминува од политичката сцена. Наместо да се преземат мерки, и тоа веднаш, за расчистување на овој криминал, власта прави се да го забошоти“, рекол Заев.
„Не знаејќи што да направи власта вели дека записот што го презентиравме, каде што Груевски го договара кешот, наводно бил монтажа, дел од гласот не бил на Груевски. Па точно е дека дел од гласот не бил на Груевски, едниот дел е на Груевски, другиот на газда Нини а третиот на соговорникот. Снимката е автентична и гласот е на Груевски. И граѓаните многу добро можат да проценат дека тоа е гласот на Груевски затоа што преку провладините медиуми секојдневно се бомбардирани токму со неговиот глас“, додал Заев.
Жителите на Русиново се револтирани од помислата дека се одлеваат огромни пари во нечии џебови додека граѓаните мака мачат со сиромаштијата, невработеноста и крпат крај со крај, соопштуваат од СДСМ.
Во наше Русиново уште канализацијата не е довршена, не поделија по партиска линија, се жалеле жителите.
И жителите на таканаречениот Ромски рид во Берово срдечно го пречекале претседателот на СДСМ. Се пожалиле на големата сиромаштија и тешкото секојдневие.
Посетата на малешевскиот регион претседателот на СДСМ ја продолжил во центарот на Берово, каде остварил повеќе средби со граѓаните а се сретнал и со младите беровци.
Младите се жалеле дека се повеќе нивни врсници заминуваат од градот барајќи работа и подобра иднина.
Заев потенцирал дека на Македонија и се неопходни промени за да се подобри животот.
„Моќта е во секој човек. Зад параванот сме сами, со нашиот глас одлучуваме дали Груевски ќе продолжи на овој начин да ја краде земјата и да ја држи во заложништво или ќе тргнеме напред во подобра иднина за сите“ порачал претседателот на СДСМ, Зоран Заев пред беровци.