Без силна опозиција и народот е уплашен, вака претседателот на СДСМ Зоран Заев денеска во неформален брифинг со новинарите ја образложуваше новата стратегија за делување на партијата.
-Народот живее во ужасен страв. Ако опозицијата не е силна, како тогаш народот ќе се охрабри и обратно. Затоа нашата стратегија и нашиот концепт е да му покажеме на народот дека сме силни, рече Заев.
Заев посочи дека СДСМ и тој како лидер се подготвени есенва повторно да седнат на преговори за нивното евентуално враќање во парламентот со ВМРО-ДПМНЕ и лидерот и премиер Никола Груевски, но потенцираше дека условот за формирање на техничка влада 6 месеци пред евентуално одржување на предвремени избори е едно од барање кое не подразбира отстапки.
– Не мора да се вика техничка влада, нека се вика „4 министерства“ на пример, ако треба и вербално ќе ја задоволиме неговата суета, но барањето останува, а во меѓувреме опозицијата ќе работи на својата стратегија која подразбира постојано алармирање на јавноста за грешките на владата и понуда на решенија, одговори претседателот на СДСМ на новинарско прашање околу тоа дали враќањето во парламентот може да се случи доколку Груевски не прифати техничка влада.
На прашањето зошто од една страна опозициските пратеници не одат во парламентот на работа, а од друга страна земаат плати од 1.000 евра Заев рече дека иако тие пратеници дејствуваат вонпарламентарно, во отсуство на силен законодавен дом тие својата работа ќе ја работат надвор и помеѓу граѓаните од кои се избрани и платени.
– Не е чесно и не е фер од некого да се бара да биде авангарда на борбата, а притоа тој и неговите деца да трпат за леб. Тие пари, тие 1.000 евра плата не се пари на мајка му на Груевски, туку пари на граѓаните на Македонија. Како нивни избраници опозициските пратеници ќе ја работат работата за која се платени, но надвор од парламентот и помеѓу граѓаните, вели Заев.
Како пример за тоа што ќе работат надвор од парламентот, Заев ги посочи наводните промени во Законот кој го регулира данокот на добивка.
– Знаат ли граѓаните на пример дека кон крајот на јули власта го промени законот и сега сите фирми ќе мораат да плаќаат данок на добика дури и кога се одлучуваат да ги остават парите во фирмата. Значи без разлика дали ја вадат добивката за себе или одлучуваат да ја реинвестираат во компанијата, тие ќе мора да платат данок на добивка. Ова никој не го споменува ако нема опозоција, објасни Заев.
Тој рече дека нивната отсустност од политичката сцена летово се должи на изготвувањето на стратегијата на опозицијата нарекувајќи ја „стратешка отсутност“.