Македонија е одлучна за својата иднина во НАТО и ЕУ и никој не може да и застане на патот – одлучно ја започна својата изјава премиерот Зоран Заев по крајот на денешната лидерска средба.
-Јас знам дека сте изморени од политички кризи , од препукување меѓу партиите и поделби. За жал, Христијан Мицкоски не успеа да го препознае моментот, наместо да се качи на возот кој брза кон ЕУ и НАТО, тој избра да остане на мрачната страна на историјата.
После денешната трета лидерска средба, се стана јасно. Христијан Мицкоски срамно лаже кога тврди дека ова на раководство на ВМРО ДПМНЕ му биле важни изборот на Државната изборна комисија со двотретинско мнозинство, техничката влада за следните избори или законот за финансирање на политичките партии – рече Заев во својата изјава.
Според него, лидерот на опозицијата Христијан Мицкоски „лаже дека сака Македонија да стане членка на НАТО и ЕУ, лаже дека сака правна држава, лаже дека се бори за чесен референдум“.
-Откако виде дека не постои минимум шанса да зборуваме за директна или индиректна амнестија, денес беше принуден декларативно да се откаже од неговата срамна цел, по секоја цена да издејствува спас за неговите ментори и колеги.
Мицкоски денеска разговараше без намера да се договори.
Мицкоски одби да се откаже од својата намера со бојкот да ги уништи европските и НАТО перспетивите на граѓаните – рече Заев.
Премиерот испрати порака до јавноста дека тој и сите кои се рамо до рамо со него, нема да дозволат опозицијата да ја држи Македонија и понатаму во заложништво.
-Јавноста нека биде спокојна, тргнуваме силно, како никогаш порано одлучни и решителни, Македонија да успее. Ќе победи волјата на граѓаните – рече Заев на крајот од неговата изјава.