Премиерот Зоран Заев денеска најави дека доколку претседателот Стево Пендаровски не организира лидерска средба поврзана со евроинтеграцискиот процес и ветото од Бугарија, дека самиот тој до крајот на годината ќе биде организатор на таква средба на која би се разговарало и за ковид-кризата.
-Претседателот на ВМРО-ДПМНЕ Христијан Мицкоски го повика претседателот на државата да свика лидерска средба, но не сум во тек што се случува. Доколку не се свика таква лидерска средба, јас би го контактирал претседателот Пендаровски за организирање на таква средба. Доколку тој нема таков план, веројатно јас до крајот на годината ќе свикам лидерска средба на која теми ќе бидат и евроинтеграциите, но и ковид-кризата како и за други прашања од интерес за граѓаните, рече премиерот Заев одговарајќи на новинарско прашање во рамки на отчетот за сработеното на Владата во првите 100 дена.
Тој истакна дека власта сака да изгради консензус по повеќе прашања и проекти, а оти еден таков е и проектот за изградба на нов Клинички центар.
Лидерот на ВМРО-ДПМНЕ, Христијан Мицкоски експресно одговори дека ако поканата е од претседателот Пендаровски, тој нема д дојде.
– Не ја гледам улогата на Стево Пендаровски во оваа лидерска средба. Пендаровски не е лидер на политичка партија, ако е потребна поддршката на политичките партии, ние да разговараме за нешто, тогаш се знае треба да седнат политичките партии и да разговараат. Се знае кој треба да ја свика. На формат организиран од Пендаровски нема да учествувам , ако дојде на иницијатива на Владата, да ќе учествувам – рече Мицкоски.