Нема да дозволам нарушување на дигнитетот на институциите на системот, без разлика дали некој поединец го нарушил угледот на одредена институција и од тука да се извлекуваат еднакви заклучоци за целта, капацитетите и сите обвинители, истакна премиерот Зоран Заев, во одговор на пратеничко прашање.
-Специјалното јавно обвинителство е орган создаден со консензуално гласање на Парламентот. СЈО ако институција е целосна служба и капацитет на оваа држава. Сето тоа што е јавно објавено како податоци за работењето на СЈО, е објавено од оваа Влада, транспарентно, до крај, и тоа е убавината и вредностите што оваа нова власт ги донесе, рече премиерот Заев додавајќи дека постојат органи кои ќе потврдат дали некој работи законски, а кој незаконски.
Заев одговараше на прашање на пратеникот Крсте Јовановски од ВМРО ДПМНЕ кој рече дека настапува во името на лицата кои се обвинети и осомничени во случаите на СЈО, институција, која според Јовановски е компромитирана.
Заев рече дека не држат тезите дека не постоеле случаите за злоупотреба на парламентарните избори што ги отвори и што ги води СЈО. Тој уште ги посочи случаите со уривањето на „Космос“, за недоследностите при градењето на делницата од кинеските компании, за закани од позиција на моќ, за злоупотреба на службени овластувања.
-Таму каде што нема докази, секој е слободен граѓанин. Но, поради тоа што оваа Влада одлучила да ги објави сите податоци на финансиски трансакции од 2010 година до сега да извлекувате заклучоци и да го деградирате СЈО, како систем основан од сите во државата, заради тоа што не функционирало државното обвинителство, тоа не смееме да го дозволиме, рече Заев, повикувајќи на поединечна одговорност која треба да се утврди низ судска постапка.
Тој рече дека Парламентот нема надлежност во постапките и дека тоа е во надлежност на судиите и обвинителите, а Парламентот е надлежен за правосудните реформи.
-Треба да биде јасно и гласно, овој период нема ни три отсто нови судии од вкупниот број на судии. Нема ни три отсто нови обвинители од вкупниот број на обвинители во државата. Неколку поединци ја уриваат правната држава и правосудниот систем. Во моментот Антикорупциска комисија проверува имот, пари, на семејства и на сите министри во Владата и на премиерот, и тоа е добро. Но, треба да ги провери и имотите на сите судии и обвинители, на адвокатите поврзани со нив, рече Заев.