Од овде, од Куманово, му порачувам на премиерот Никола Груевски дека за криминал се одговара, рече претседателот на СДСМ, Зоран Заев, на синоќешниот граѓански собир.
Тој потенцираше дека ниеден криминал не може да остане неказнет и го повика премиерот Никола Груевски да понесе одговорност за мега скандалот со подигнатите 1,5 милиони евра во кеш, за продажбата на Македонска банка.
Ова не може да остане неказнето. Игрите со кеш мора да прекинат. Валканите раце подалеку од Македонија, дециден беше претседателот на СДСМ.
Заев ги повика граѓаните масовно да излезат на изборите в недела и да гласаат за нов, чесен концепт за спас на Македонија.
-Македонија е жедна за промени. Ние нудиме чесен и искрен концепт кој е модел за спас на Република Македонија. Заедно ќе ја градиме, заедно ќе кажеме во кој правец ќе се движиме. Затоа на 27-ми да излеземе масовно и зад параванот да донесеме одлука за нашата татковина и за нашата иднина, рече Заев.
На собирот се обрати и претседателскиот кандидат Стево Пендаровски кој повика на целосна политичка промена за Македонија да биде подобра држава за сите граѓани.
-Ние немаме друга држава, немаме две македонии. Она што тие го нудат е пропаст на Македонија. Затоа мораме да се одважиме и да ја донесеме вистинската одлука. Одлука за комплетна политичка промена се со цел Македонија да биде подобра и посреќна држава на сите граѓани. Да останеме здружени, да останеме заедно и да се избориме за промени, порача претседателскиот кандидат Стево Пендаровски на собирот.
На граѓанскиот собир во Куманово говореа и кандидатот за пратеник од овој град Љубиша Николиќ како и носителот на Изборната единица 2 од СДСМ и коалициските партнери, Петре Шилегов. Тие истакнаа дека Македонија заслужува претседател, но Македонија заслужува и промени за нов почеток.