Претседателот Стево Пендаровски е врв на државната пирамида и тој треба да се почитува, особено затоа што тој е неутрален и им излегувал во пресрет на опозицијата, рече премиерот Заев одговарајќи на новинарското прашање и објасни дека сепак, имал намера да организира лидерска средба со цел да информира за разговорите со Бугарија.
Но, нагласи, на добрата негова намера добил несоодветна реакција од шефот на опозицијата Христијан Мицкоски преку неговата објава на Фејсбук, поради што се откажал од идејата.
„Мицкоски во својата објава напиша: ,да – ќе се разговара за техничка влада, да – ќе се разговара за неспособноста на државата, да – ќе се разговара за неспособноста да се справи владата со коронавирусот’ … зошто и за што тогаш да разговараме? Не се согласувам со тие негови прашања. Покажаме како Влада дека водиме сметка за нашите црвени линии во разговорите со Бугарија, за жал не ја добивме првата меѓувладина конференција, но ќе ја добиеме.
-Се справуваме со коронавирусот и подобро од многу поразвиени земји, но не сакаме честа и достоинството на здравствените работници да ја погазиме на лидерска средба заради ставовите на еден лидер од опозицијата за кои може да се каже дека се забегани. Затоа не гледам причина да свикам лидерска средба, ќе барам други алатки да информирам за разговорите со Бугарија”, изјави Заев.