– Урбанистичкото планирање и градење согласно законите е клучно, како и важноста за усогласеноста на деталниот урбанистички план со генералниот, што веќе е потврдено, изјави премиерот Зоран Заев за пацелата кај Холидеј Ин на која планирано е да се градат три објекти и за што изминатиот период имаше голем број реакции во јавноста.
Според Заев Скопје треба да продолжи да се гради но со усул, односно мегаломанските проекти треба да бидат скратени, скротени и нормализирани.
– Сивилото на цементираното паркиралиште не е трајно решение за Холидеј ин, но не е решение и шеесеткатница. Затоа усогласеноста на ГУП-от со ДУП-от е важна работа и тоа е потврдено. Правото согласно Устав и Закон не може никој да го спречи, односно тој што ќе го спречи на крајот треба општината или државата да плати, а веќе имаме плаќано штети од по 6 милиони и 8.5 милиони евра од минати постапки, изјави Заев.
Премиерот истакна дека според конкретниот проект, повеќе од половина од парцелата којашто е во постапка за одобрение за градба е предвидено да биде зелена површина, односно од планираните 12.000 метри квадратни, дури 6.500 се планирани да бидат зеленило.
– Ова е значително поголема површина од законски предвидениот минимум кој изнесува 20 проценти, објасни тој, додавајќи дека со новиот Закон за урбанистичко планирање не се дозволува паркинг надвор од парцелата, што дополнително го скротува „мегаломанството“ на самата градба, вели премиерот.
Според него доколку се исполнети сите законски услови за реализација, а некој надвор од законот се обиде истата да ја спречи, треба да обезбеди средства за надомест.
– Доколку на конкретно место кадешто има објект – куќа, зграда или фабрика, некој сака да изгради парк, и доколку соодветните органи или во конкретниот случај Советот на Општина Центар одлучи така, треба да обезбедат пари да го платат тоа и да го направат паркот. Во случај тоа да не се реализира, треба да дадат планот да се развие, односно да ја исполни целта на постоењето, вели Заев.