Кандидатот за лидер на СДСМ Зоран Заев донел одлука да не се повлекува од трката, по вчерашната итна средба со Радмила Шеќеринска, која според најавите, доколу победат, би била негова десна рака на лидерската позиција, изјавуваат високи извори од оваа партија.
Во исто време, како што велат изворите, Заев апелира за единство во Партијата, како и зрелост на членството, гледајќи ја СДСМ со новото раководство како надеж за Македонија и нејзините граѓани.
Заев претходната најава за повлекување ја донел откако во меѓупартиските односи видел дека постои закана за единство во Партијата, по претпоставките дека тој и Шеќеринска се фаворити за победници на јунскиот Конгрес, кога се бира наследник на Црвенковски и оттука и комплетно ново раководство.
Претходно, Заев даде воздржана изјава за најавите за негово повлекување:
-Не сакам да ги коментирам јавно внатрешните работи на СДСМ. Оваа цела постапка за претседател на СДСМ е внатрешна работа на мојата партија и ве молам да оставиме СДСМ да ги донесе најдобрите одлуки за својата иднина.
Во целата констелација на односи, моќта на Црвенковски е најголемиот предизвик за кандидатите, кои на разни начини се обидуваат или да ја неутрализираат ако веќе не можат да ја анулираат, други пак да ја наследат: Оние кои сакаат комплетни промени се обидуваат да создадат простор за целосна реформа во партијата согласно сопствениот авторитет и харизма, додека оние наклонетите кон него да го искористат за свои цели- со неговиот авторитет и харизма да го привлечат членството и да лобираат за своја победа.
Крајниот рок и конечниот епилог ќе биде познат на 16 мај, кога веќе ќе се кристализираат конечните кандидати и нивниот распоред на силите.