И СДСМ ќе гласа доколку бидат распишани референдуми за забрана за отворање кампови во Македонија. За да покаже дека станува збор за политичка манипулација на ВМРО-ДПМНЕ и дека кампови во земјата нема да има.
Ова е суштината на денешната изјава на премиерот Зоран Заев во Велес. Тој смета дека референдумите од неколку општини за изградба на станови за бегалци најавени за денот на локалните избори се политичка манипулација за дефокусирање на вниманието на граѓаните во пресрет на изборите.
“Македонија не е толку добра земја за да останат бегалците овде. Дај боже да е добра земја, тогаш ќе имаат аспирации да останат. Ова е политичка манипулација од страна на нашиот политички опонент којшто сака да го дефокусира вниманието на граѓаните во пресрет на локалните избори и тоа го прават затоа што се исплашени дека ќе ги загубат и општините”, изјави Заев.
И додаде дека ставот ќе се договара со партнерите од коалицијата:
“Тој ќе биде едноставен и логичен за баналноста на оваа политика да ја доведеме до апсурдност. Ќе го поддржиме референдумот, ќе гласаме ,,за“ и што правиме потоа? Нема излез од таквата мерка и така ќе ја покажеме нејзината баналност. Граѓаните бараат програми и а не лаги со опашки за замајување на јавноста во Македонија”, изјави Заев.
Општините Кавадарци, Штип и Гази Баба донесоа одлуки за распишување референдуми против изградба на кампови за бегалци а тие треба да се одржат истовремено со локалните избори на 15 октомври.
Веќе подолго време граѓанската иницијатива “Будење”, со активисти се и општински службенци од ВМРО-ДПМНЕ собира потписи во повеќе општини во земјава за референдум на кој граѓаните треба се изјаснат против изградба на станови за бегалци.
По големиот бегалски бран од 2015 година во Македонија азил побарале само 15 бегалци.