Лидерот на СДСМ, Зоран Заев кој утрово даваше исказ во ОЈО за случувањата на 27.април, вели шестмина пратеници од ВМРО-ДПМНЕ помогнале при отворањето на вратите од Собранието и доколку не се случело тоа можело да се избегне насилството.
– Шестмина пратеници од ВМРО ДПМНЕ учествувале директно во организирањето на отворањето на вратите, двајца ги дигнале металните профили и останатиот дел од шестмина дадоа директни патокази како да се оди до прес салата кадешто беа мнозинството од пратениците од парламентарното мнозинство. Верувам дека тоа во постапката ќе биде утврдено, постојат докази, јас го зборувам ова на основа на докази, јасно видливи и воочливи и не знам едноставно како ќе можат и тие мои колеги пратеници да не видат нас во очи, и како ние ќе ги видиме, изјави Заев.
Тој објасни дека Собранието има 5 влеза, а биле тргнати единствено челичните шипки или профили од главниот влез или главните влезни врати на Собранието.
-Стопроцентно беа тргнати за жал од мои колеги пратеници и знам дека немаше да се случи ни „н“ од насилство ако моите колеги пратеници не го направеа тоа, односно не ги на добро осмислен начин, преку телефонски разговори, договарајќи го со некого тоа, целосно шестмина, коишто јас имав прилика да ги видам, учествуваа во тргнувањето на челичните профили па дури и нивно буткање со нога, за да масата не се сопне кога ќе влезе, на едната врата, па на другата врата, па покажувајќи многу прецизно кој е најблискиот пат да се стигне до прес салата, тоа е покрај пленумот, овде во холот кадешто одмараат пратениците во кратките паузи, директно до скалите коишто водат до холот на прес салата, вели Заев.
Тој раскажал пред обвинителите на се што се сеќава од тепањето на пратениците.
На новинарско прашање дали очекува Обвинителството да покрене обвинение или постапка за посериозно кривично дело како што е обид за убиство, Заев рече дека остава професионалците да го утврдат тоа, а тој само го кажувам неговиот впечаток со сите детали- од организација, осмислување, оркестрирано и диригирано.
-Мавањето со сталаците на вашите камери, мавањето со сите овие железни предмети коишто беа од столиците, од масите, дрвените предмети, фрлањето на гајтаните од самите камери коишто беа таму пристуни во салата со цел да бидеме фатени за врат, за екстремитети веројатно, извлечени или удавени или слично сето тоа го кажуваме со зборови, стручните луѓе и обвинителството се тие коишто треба да му дадат квалификација на делото, рече Заев.
Заев воедно информираше дека во моментов подготвува писмо до претседателот Иванов како гаранција за унитарноста и државниот суверенитет, кое рече ќе го објави јавно и очекува до средината на следната недела да му биде доделен мандатот за формирање нова Влада.
На прашањето дали лично би му простил на нарачателот на насилствата, Заев рече дека веќе на 28. април повикал на помирување и простување, но пред законот треба да одговараат сите одговорни.
-Тоа не е ни моја обврска. Законот мора да важи подеднакво за сите, но јас уште наредниот ден, простив. И ја испратив пораката на простување, заради тоа што сум одлучил да се занимавам со политика и да работам во интересот на граѓаните на Република Македонија, ако не простите, тогаш нема иднина, јас сакам да имам успешен период предводејќи ја новата Влада на Република Македонија, а заради тоа ни треба кооперативна, конструктивна и критична опозиција, силна опозиција, ако не простите, тогаш не можете да го очекувате тоа. Истовремено како што никој не треба да одговара ако нема докази за некое сторено дело, навистина треба да престане времето кога невини луѓе лежеа по затвори, изјави Заев.