Премиерот, Зоран Заев денеска рече дека се очекува оваа недела да биде донесен Законот за употреба на јазиците и дека по девет месеци расправата треба да биде завршена.
-Знаете дека 9 месеци е отворена дебатата и за мене прашањето за Законот за употреба е затворено и треба што поскоро да се донесе. Порано се носеа вакви закони со завршување на парламентарните избори, пред изборот на владата. Сега е поинаку. Девет месеци е отворена дебатата. Сите кажаа се што имаа да кажат. Тоа е едно уставно право што не е реализирано. Да го оставиме нека се реализира, нека има своја имплементација, и ќе видиме сите дека не е нешто што е тешко или болно, туку ќе ни помогне сите заедно подобро да се разбираме. Пораките што ги испраќа шефот на опозицијата се копи пејст на оние што ги испраќаше неговиот претходник Груевски, рече Заев одговарајќи на новинарско прашање на прес конференција со претседателот на претседателството на БиХ Денис Звиздиќ.
Тој повтори дека Владата е стабилна и мнозинството во Парламентот расте и ќе расте и дека за тоа уште се разговара.
-Но оваа недела треба да се донесе Законот за јазиците и со тоа последниот легалистички концепт од Охридскиот рамковен договор-Законот за употреба на јазиците ќе биде затворен. Чекорите ќе се движат согласно демократските процедури и ваквите прашања, кои ќе ја крепат мултиетничноста на државата, конечно ќе бидат затворени, рече Заев.