Зоран Заев во интервју за Алсат најави ревидирање на полтичката карта на патриотизмот со која играше СДСМ во минатото.
„Како партија неколку пати се обидовме да играме на политики на патриотизмот. Но тоа на нашата партија не ѝ прилега. И тука апсолутно загубивме. Чесно е да признаеме, за да бараме шанса за во иднина, за да не правиме вакви грешки. Од нас народот не очекува да глумиме патриоти.
– Ние сме државотворна партија. Ние сме партија што беше пример за мултиетничкиот соживот. Ние сме партија што ја стави на стабилни нозе оваа наша земја. Се обидовме да ќариме поени кај граѓаните играјќи на патриотски варијанти , како на пример со Законот за бранителите, Струга, Кичево… Тоа на нас, социјалдемократите, не ни личи. Луѓето очекуваат да бидеме за кохезивност, да бидеме сплотувачкиот фактор“, изјави Заев во интервју за Алсат.
Во својот прв ТВ настап по изборт на функцијата претседател на СДСМ , Заев се осврна и на проблемот со бранителите и поранешните припадници на ОНА.
„Решавањето на проблемите на семејствата на бранителите или на припадниците на ОНА, тоа што го бара ДУИ, е прашање што мора да се седне и да се затвори, да се разговара за неговото решавање. Сите заедно сме исправени пред нови предизвици“, рече Заев во интервју за Алсат.