Специјалното јавно обвинителство денеска соопшти дека отвора четири финансиски и даночни истраги против 4 лица, а во следните денови ќе биде поднесен и обвинителен акт за случајот Транспортер, каде првоообвинет е градоначалникот на Битола, Владимир Талески.
Првите две истраги, под кодно име „Табла“ и „Триста“ се за злоупотреба на службената положба, додека другите две истраги „Тотал“ и „Тифани“ се за даночно затајување.
Првата истрага е под кодно име „Табла “, за основано сомнение дека директор во централното основно училиште во село Зајас ја злоупотребил службената положба и на 28 06.2006 година склучил договор без јавна набавка спротивно на решението на Министерството за образование склучил договор во вредност од 12.346.394 денари или 200.000 евра, за изградба на училиште во кичевско село.
Втората истрага под име „Триста“ се однесува на јавна набавка за купување и сервисирање на возила, при што постои основано сомнение дека помошник министер во МВР преку избор на фимри кои не биле економски најповолни на овој тендер, го оштетил буцетот за 2.789.455 денари или 453.570 евра.
Како што образложи обвинителката Фетаи, помошникот министер во МРВ кој бил надлежен за јавни набавки со седум компании: Порше, Колевски, Бохемија автомобил, Кадис, Автомакедонија и Автокуќа за возила од три лота. Со истрагата е утврдено дека исплатените 318.050.319 денари, се всушност за 27.894.555 денари повеќе од она што би било исплатено доколку биле избрани економски најповолните понуди.
Третата истрага е под името „Тотал“ и се однесува на продолжено кривично дело за даночно затајување. Постои основано сомнение дека физичко лице, како сопственик и управител Тотал маркетинг агенција ДООЕЛ Скопје,Тотал маркетинг ДООЕЛ Скопје, Медиа макс ДООЕЛ Скопје, Тотал медиа центар ДООЕЛ Скопје, во периодот од 2008 до 2015 со намера да одбегне делумно плаќање на данок во завршните сметки за даночна пријава давал лажни податоци, со затаил данок кај правните лица во висина 121.414 евра, а бидејќи овие средствата ги користел за лични потреби, не платил и данок на личен доход во висина од 63.032.
Обвинителката Фетаи нагласи дека овие средства се користени за лични потреби бидејќи само во три од фирмите нема ниту едно вработено лице, а во една од нив имало две и тоа едното вработено во август 2014, а другото во септември 2015.
Меѓу предметите што биле купувани како основни средства за фирмите имало душеци „меџик тач“ за 3.080 евра, рачен часовник за 2.341 евра, мебел за 65.940 евра, персиски теписи и кујнски садови.
Четвртата истрага под името “Тифани“ е за продолжено кривично дело даночно затајување за едно физичко лице, сопственик, управител и потписник на фирмите Смарт центар дооел експорт импорт и Смарт груп дооел Скопје.
Според истрагата, осомничената од 2008-2014, таа и правното лице одбегнале делумно плаќање данок од 37.634 евра за фирмите и 16. 920 евра за личен доход со тоа што давала лажни податоци во даночните пријави. Како управител осомничената ги користела фирмите како параван за лични потреби. Притоа обвинителката Фетаи, обелодени дека како основни средства за фирмите биле наведени набавки на долна облека од 500 евра, друга облека, обувки за 33.508 евра, луксузен мебел, сигурносни врати, точаци и друго.