Партиските игри во делот на именување на директорски места во помалите населени места не престануваат.
Ова е констатацијата на советничката група на СДСМ во општина Василево, по денешната седница на Советот. Тие побараа одговор на неколку прашања во делот на буџетот и именувањето на функцијата директор на детската градинка „ Прва радост“, но како што велат, мнозинството е во рацете на владејачката партија, па законите не важат.
На седницата беше присутна и новоименуваната директорка Даниела Трајковска, од која беше побарано да каже со какво работно искуство го стекнала местото директор, покрај функцијата советник која ја извршува во моментот.
„Во систематизацијата за извршување на функцијата директор која самите ја имаат наведено, стои дека е потребно четири години работно искуство по дипломирањето, што значи дека самите се побиваат, зошто новоименуваната директорка тоа искуство го нема ниту пак на денешната седница го кажа, вели Џоко Христов, советник од СДСМ.
новоименуваната в.д директортка Даниела Трајковска
Новоименуваната Трајковска истакна дека за функцијата в.д. директор за која е назначена не е потребно работно искуство во образованието и додаде дека таа до сега има стекнато работно искуство, но и дека нема потреба советниците да го знаат истото. Подетални изјави рече дека ќе даде утре, кога и официјално ќе биде пуштена во употреба градинката.
Градоначалникот на општина Василево, Ванчо Стојанов, изјави дека не постои никаков судир на интереси, зошто новоименуваната директорка на следната седница ќе си поднесе оставка од функцијата советник. А во делот на именување на позицијата, в.д. директор, како што истакна, ги исполнувала сите услови. Тој потенцираше дека според законот, четиригодишно искуство по дипломирањето е потребно за функцијата директор, но не и за функцијата в.д. директор. Стојанов додаде дека во тој дел е потребно да има завршено високо стручно образование.
Од опозициската советничка група, незадоволни од распределувањето на средствата во буџетот, изјавија дека се кратат средства во делот на капитални инвестиции, што според нив се потврдувал фактот дека во општина Василево не се работи ништо, а се зголемувале трошоците во делот на невладините организации кои и самите не ги знаеле.
„ Еве зошто преку текот на целата година како опозиција укажувавме дека општина Василево има нереален буџет. Денес од капитални приходи кратиме околу 9,5 милиони денари, со што се покажува дека во општината ништо не се гради и ништо не се работи.
Но, од друга страна имаме зголемени трошоци за патни и дневни расходи и трансферирано многу повеќе пари за невладини организации за кои не знаеме ниту кои се, ниту пак каков бенефит имаат граѓаните на Василево од истите“, вели Христов.