Предлог-законот за јазиците на пленарна седница во Собрание ќе се најде или со еден разгледан амандман од страна на Комисијата за европски прашања, доколку се постигне до вечерва на полноќ, или со ниту еден.

До крајот на денот треба да заврши амандманската расправа, потврди претседателот на Комисијата, Артан Груби кој според Деловникот има обврска да ја затвори дебатата и да го проследи законот до Собранието.

Движењето Беса пред почетокот на денешната седница соопшти дека нема да присуствува, бидејќи за нив она што се случува во Собранието бил „политички театар“.

„Нема да учествуваме во работата на Комисијата бидејќи сметаме дека ќе продолжи театарот и ние немаме намера да учествуваме во тој театар“ изјави денеска пратеникот Фадил Зендели.

Беса бара да се гласа за два нивни амандмани. Со првиот партијата бара да се смени името на законот и да се вика Закон за употреба на албанскиот јазик, а вториот е за целосна употреба на албанскиот јазик во државните институции.

Груби на прес-конференција во Собранието рече дека бил разочаран од ваквиот пристап на Беса како што бил разочаран од нив кога не гласале ниту кога се бираше Талат Џафери, ниту кога се разрешуваше Марко Зврлевски.

Продолжението на седницата денеска помина во реплика на пратеникот Реџаил Ислаили од ДУИ, кој зборуваше над еден час, образложувајќи го и читајќи го текстот на законот член по член.

Потоа Груби ја прекина седницата и продолжението го закажа за 17:00 часот.

Прашан зошто не ја лимитира расправата, односно говорите на пратениците, Груби рече дека во тој случај би го прекршил Деловникот на Собранието.

„Јас сум обврзан деловнички да ја затворам дебата вечерва по овој предлог закон и да го проследам на понатамошно читање без разгледување или со разгледување или без усвојување или со усвојување на кој било амандман ќе видиме до вечерва на полноќ“, изјави пратеникот на ДУИ.

Тој потенцираше дела целта на ДУИ е овој закон да биде усвоен што е можно поскоро на пленарна седница непроменет.