Уставниот суд наскоро ќе ја разгледува Иницијативата за оценување на уставноста на Законот за Специјално јавно обвинителство.
Пред осум месеци претседателот на Светскиот македонски конгрес Тодор Петров и Томе Тодоровски , адвокат од Свети Николе поднесоа иницијативи со кои го оспорија.
За нив е спорно што со донесувањето на Законот, постојаното Јавно обвинителство не е веќе ,, единствен и самостоен државен орган кој ги гони сторителите на кривични дела,, туку со закон е воведен специјален јавен обвинител кој работи врз основа на овластувања што ги нема во Уставот.
Тоа според нив создава ситуација за одреден сегмент на кривични дела да бидат оневозможени и блокирани надлежноста, работата и функционирањето на Јавното Обвинителство.
Се оспорува и делот кој се однесува на организацијата и начинот на функционирањето на специјалниот јавен обвинител како и траењето на мандатот од 4 години.
Од СЈО досега повеќепати се изјаснија дека Законот не е спорен и дека како Јавно обвинителство за гонење на кривични дела поврзани и кои произлегуваат од содржината на незаконското следење на комуникациите постапува согласно Законот за Јавно обвинителство за гонење на кривични дела поврзани и кои произлегуваат од содржината на незаконското следење на комуникациите и дека тоа е во согласност со Уставот на Република Македонија, меѓународните договори ратификувани во согласност со Уставот и законите во Република Македонија.
Бидејќи формирањето на СЈО е резултат на политички договор меѓу четирите најголеми партии (Договорот од Пржино), за експертите е доволен знак дека Уставниот суд не може да го укине.