Фирма во која ко-сопственик е актуелниот заменик-директор Аргетим Асани на Управата за јавни приходи и должи на државата неплатечни давачки од околу 10 милиони денари – 4.528.415 за неплатен данок на добива, 4.058.723 милиони денари за данок на додадена вредност и 265.192 илјади денари персонален данок.
Информацијата ја објави порталот на албански јазик Дитапрес повикувајќи се на документи од Централниот регистер. НОВА ја провери сопственичката структура на фирмата ТД Авел во која еден од оснивачите навистина е Аргетим Асани, актуелниот заменик – директор во УЈП, а во редакцијата пристигнаа и документи кои ја потврдија информацијата за неплатените даноци.
Директорот Асани за НОВА потврди дека фирмата има проблеми во однос на долговите кон државата, но напомена дека тој таму е само акционер, а голем дел од тие долгови се предмет на судски спорови.
-Не знам точно колкави се долговите, но има и жалби во моментов, кога ќе завршат тие жалби долгот сигурно ќе се плати, кажете ми кој може да и избега на државата за неплатен данок. Воедно, јас не се занимавам со тоа бидејќи јас таму не сум никаков директор, само акционер. Фер е да се каже дека, исто така, јас на функцијата во УЈП стапив пред само неколку недели, а дури ни претходно не сум бил овластено лице во таа фирма, вели Асани за НОВА.
Некои од долговите се стари и речиси цел деценија. Извори на НОВА во Управата за јавни приходи коментираат дека претходникот на Асани, Мухамед Ахмети, бил сменет токму поради одбивањето да ги толерира долговите на оваа фирма. Тој одби да ги коментира овие шпекулации, но потврди дека до ден денешен не знае зошто бил сменет од таа функција.
За причините за смената на Ахмети не знаат ниту во Владата, иако тие го разрешиле и го назначиле новиот директор. На крајот на Ноември годинава на затворена владина седница Ахмети беше разрешен без образложение, а на негово место беше поставен Асани. Портпаролот на Владата Мухамед Хоџа вели дека ни тој не знае зошто Ахмети бил разрешен.
-Јас присуствував на таа седница на Владата. Немаше образложение, веројатно тоа си е договор меѓу партиите, како што знаеше во Владата не е само ДУИ, туку и ВМРО ДПМНЕ. Едноставно беше разрешен без образложение и беше назначен Асани.
Хоџа директно кажа дека директори назначува и разрешува коалицијата. Исто така, рече дека Асани бил кадар на Нова Демократија ,а не на ДУИ, но бидејќи тие им помагале на локалните избори имале добра соработка. Најави дека ќе потврди дали е сега преминат комплетно во ДУИ, но после првиот разговор не се јави.
-ДУИ го предложи, да, но го назначи владата, не само ДУИ. Тој помагаше на локалните избори, за долгот на фирмите во кои е оснивач не знам да ви кажам, тоа е се што знам, а за разрешувањето на Ахмети немаше образложение, веројатно коалицијата се договориле и тие знаат, вели Хоџа.
Портпаролот на ДУИ, Бујар Османи, не одговори на повиците ниту на смс пораките. Прво го исклучи нашиот повик, потоа прати СМС за да пријави дека во моментот не може да се јави, но потоа, откако пишавме за што се јавуваме комуникацијата престана.