За 5.000 денари поскапа академската година
Студентите сметаат дека трошоците се преголеми, а не би требало тие да се оние кои ќе ги подмират.
Марија Тодоровска
Новата академска година – нови поголеми трошоци за студентите. Дури за 5.000 денари поскапа академската година. Низ уплатниците кои ги плаќаат студентите при секое запишување нов семестар се провлекоа две нови уплатници: “Набавка на on-line ресурси за реализација на студиските програми“ и Набавка на материјални ресурси за реализација на студиските програми“.
Што точно значат овие уплатници и кои услуги ќе ги чинат студентите 5.000 денари за целата година?
Студентите претходно на студентски прашања носеа обрасци за упис и заверка на семестар (кои отприлика чинеа 50 или 100 денари од лист), оваа година тоа ќе можат да го направат преку системот iknow.
Студентите исто така ќе ја имаат и опцијата наместо во банка семестарот да го уплатат повторно преку iknow системот.
Ова е образложението за студентите зошто плаќаат поскапо оваа година.
„Процентуално покачувањата се доста големи, а не бевме ни соодветно предупредени за нив. Стигнаа две уплатници од по 2.500 ден а не ни знаеме за што ги плаќаме. Наведени се онлајн ресурси и материјални ресурси, а сепак носиме некаков документ на студентски прашања и сами си ги купуваме книгите за кои трошиме по 2000 денари минимум во семестар.“, изјави за Нова студентка од Правниот Факултет „Јустинијан Први“.
Според соопштението испратено на студентите од Правниот факултет тие сепак и покрај е-услугите ќе треба да однесат статистички лист, што “нормално”, и ова самите ќе си го купат од книжарница.
Друг студент од трета година за Нова споделува дека плаќањето на iknow системот не функционира.
„Да, плаќаме за дополнителни услуги, односно за обрасци за упис и заверка на семестар, бидејќи нема да купуваме обрасци, ќе се запишува и заверува онлајн, потоа трошоци за одржување/користење на центрите за правна клиничка едукација ( не знам досега дали сме плаќале), за набавка на on-line ресурси за реализација на студиските програми и за набавка на материјални ресурси за реализација на студиските програми. Но и покрај дополнителните услуги, ние треба да носиме документи на факултет, да се запишува семестар во индекс и најверојатно да се достават уплатници бидејќи некои студенти немаме опција да платиме електронски преку I know системот, а тоа ни беше првична информација дека ќе можеме да платиме електронски, но можеби има некој проблем со системот)“
Студентите исто така се жалат дека не биле навремено предупредени за новите трошоци, дознале преку соопштение еден ден пред да започне процесот на запишување семестар кој трае само една недела.
„За поскапувањата дознавме откако од Универзитетот ни испратија соопштение на електронската адреса во кое беше соопштено во кој период да завериме и запишеме семестар и беа наведени услугите за кои треба да платиме.“, вели студентка која запишува трета година студии.
Студентите сметаат дека трошоците се преголеми, а не би требало тие да се оние кои ќе ги подмират.
„Оваа учебна година трошоците се зголемени за околу 5500 денари (половина би требало да ги уплатиме во зимскиот семестар, а половина во летниот) најверојатно поради процесот на дигитализација на административните работи, но не би требало тие трошоци да ги подмируваат студентите“, вели студент од Правниот факултет.
Нашата редакција испрати прашања до Универзитетското студентско собрание, зошто собранието не ги извести навремено студентите, што точно значат називите на новите уплатници и за што ќе бидат наменети тие средства, дали планираат да преземат некаква акција со цел истите да се намалат?
Но, Универзитетското студентско собрание не одговори на нашите прашања.
Академската година 2024/25 започнува следната недела. Повеќето студенти веќе го имаат запишано семестарот со новите трошоци.