Со постоењето на струмичкиот „Астерфест“ се затвори филмскиот триаголник во Македонија, се воспостави некоја трета катета, рече Горан Тренчoвски, менаџер и втемелувач на филмскиот фестивал, парафразирајќи го Благоја Куновски во однос на рангирањето на овој фестивал.
Јубилејниот десетти фестивал се отвори вечерва со доделување на наградите на лауреатите Љупка Џундева и Борис Геретс.
Присутните на првата вечер од фестивалот го погледнаа оскаровецот „ Хелиум“ на Андерс Валтер, во кој момчето Алфред е на умирање, но преку приказните за Хелиум – магичен имагинарен свет за кој раскажува Енцо, ексцентричниот домар во болницата, кај Алфред се враќаат радоста и среќата да се живее и тој си наоѓа прибежиште од секојдневниот живот.
Тренчовски истакна дека овој фестивал денес значи многу за Струмица и Македонија иако во 2005-та година се почнало срамежливо.
„Денеска заокружуваме еден концепт кој е интересен не само во македонски туку и во странски рамки. Проекцијата на кратката и документарната филмска форма е навистина предизвик. Оваа година имаме мошне изобилна програма, допатуваа доста автори од други држави, да ги промовират своите дела и сето тоа ќе биде интересна прилика за интеракција меѓу публиката, како и едукација меѓу младите, рече Тренчовски.
Тој посака во иднина младите да продолжат да истражувааат и да разоткријат дел од тајните на филмската уметност.
Лауреатот Борис Геретс, истакна дека е горд на признанието за европски и светски филм бидејќи како што рече неопходно е да се наоѓаат нови начини за изработка на филмови. Тој го честиташе јубилејното издание на „Астерфест“ и потенцираше дека ваквите фестивали се многу значајни за луѓето од неговата фела.
„Возбудена сум, бидејќи не се надевав на наградата, благодарна сум на „Астерфест“ и на Струмица. Се чувствувам пријатно како да сум во својата куќа, бидејќи овде имам играно на оваа театарска сцена“, рече Љупка Џундева.
Значењето на фестивалот кој е гордост на сите струмичани не го криеше и градоначалникот на Струмица Зоран Заев.
„Сите се гордееме со оваа десетгодишно филмско постоење кое почна ентузијастички, а денеска е културна меѓународна манифестација. Не само што е од меѓународен карактер значаен, не само што е македонски туку е и наш, струмички, со кој што сите сме горди“, рече Заев.
Во следните четири дена до крајот на месецот струмичани ќе можат да уживаат во проекциите на
документарни, играни, анимирани и македонски филмови, со надеж дека утрата ќе бидат посветли, а ноќите потемни за поуспешни проекции и обид за поубав и побогат живот со новите филмски сништа.