Започна постапката за екстрадиција на новинарот Зоран Божиновски кој цели два месеци се наоѓа во притвор во затворот во Нови Сад.
Македонија побарала Зоран Божиновски да биде екстрадиран во државата, а во вторникот навечер Божиновски го добил решението од Основниот суд во Нови Сад за негово испорачување во Македонија.
Според адвокатот на Божиновски, Основниот суд одлучува по основ на документите, по што целиот случај оди во Апелациониот суд, каде Божиновски ќе има можност да излезе пред суд и да се брани. Одлуката на Апелациониот суд, ќе биде пратена во Министерството за правда на Србија, кај министерот од кој ќе зависи дали Божиновски ќе биде екстрадиран во Македонија.
Здружението на новинарите на Србија веќе го контактирале адвокатот на Божиновски и исто како и Здружението на новинари на Црна Гора и пратиле апел до министерот за правда, да не дозволи новинарот да биде екстрадиран во Македонија. Неговото семејство бара од ЗНМ, да упати апел до министерот за правда на Србија, македонскиот новинар да не биде испорачан во државата.
– Бараме ЗНМ да упати апел до српскиот министер за правда, исто како што тоа го направија двете други здруженија на новинари на Србија и Црна Гора, изјави за НОВА неговата ќерка Ана.
Пред три дена во скопскиот кривичен суд започна судскиот процес против 19-мината обвинети за случајот „Шпион“, обвинетите за кое се товари и Божиновски.
Во септември, со обвинување дека издавале државни тајни, шпионирале за странски служби и уценувале, беа уапсени разузнавачи, контра разузнавачи, воени разузнавачи, поранешни и актуелни вработени во Армијата, УБК, Агенцијата за разузнавање, од Државниот архив, како и новинарот Зоран Божиновски, кој негираше била каква вмешаност во „Шпион“.
Групата, според истражните органи, работела за странски разузнавачки служби, одавала информации кои се однесувале на политичката состојба, изборите, безбедноста, информации за верските заедници.
Поранешниот разузнавач Марјан Ефремов е првообвинет во случајот. Според тврдењата на МВР, Ефремов откако во 2009 година добил отказ од Агенцијата за разузнавање, формирал злосторничка група во која влегле поранешни или сегашни вработени во УБК, БЈБ, Агенцијата за разузнавање, воената полиција, Државниот архив и други.
Во септември минатата година судијата Владимир Туфегџиќ на прес-конференција излезе со предупредување до новинарите да внимаваат како известуваат во врска со полициската акција „Шпион“, со образложение дека пласирањето информации кои се класифицирани би можеле да и нарушат на истрагата, а новинарот и медиумот би можеле да повлечат кривична одговорност доколку така оцени Јавното обвинителство.