На полноќ започна предизборната кампања за предвремените парламентарни избори кои треба да се одржат на 15 јули. Политичките партии кои учествуваат на овие изборин денска ќе ги започнат своите изборни активности во услови на здравствена криза предизвикана од коронавирусот поради што не се планираат масовни собири и митинзи.
Социјалдемократите ќе ја започнат својата кампања под слоганот “Можеме” во градскиот парк во Струмица каде ќе се обрати претседателот на оваа партија, Зоран Заев. По неговата изјава за медиумите во 19 часот во амфитеатарот на градскиот парк во Струмица ќе се одржи граѓанска трибина.
ВМРО ДПМНЕ изборната кампања ја стартува под слоганот “Обнова”. На првиот ден од нивната кампања претседателот на оваа партија Христијан Мицковски ќе одржи средба со граѓани во Охрид.
ДУИ тргнува од Преспа. Оваа партија најави дека на својата промотивна конвенција во автокампот Крани ќе го соопшти името на нивниот кандидат за премиер.
Алијанса за Албанците и ДПА своите изборни кампањи ги стартуваат во Тетово.
На изборите за првпат настапува движењето Македонски концпет предводено од реформското крило на ВМРО ДПМНЕ, Петар Богојевски. Ова движење кампањата ја започнува од пред зградата на ЕУ Инфо центарот во Скопје.
Кампањата ќе трае до 12 јули , а веќе на 13 јули почнува изборниот молк.
На 13 јули ќе гласаат лицата кои се заразени со ковид-19 и се наоѓаат во домашен карантин, како и граѓаните кои имаат решенија за самоизолација. Ден потоа, на 14 јули, ќе гласаат немоќни и болни лица, како и хронично болните и сите останати кои согласно Изборниот законик гласаат ден пред одржувањето на изборите.
Денот на избори – 15 јули (среда) е прогласен за неработен и гласањето е продолжено за два часа односно ќе трае од 7 до 21 часот.
Протокол за гласање
Комисијата за заразни болести го донесе новиот протокол и опиша како треба да изгледа избирачкиот ден и што сè им е потребно на избирачките одбори на 15 јули.
На гласачките места ќе има постери и прирачник како треба да се однесуваат гласачите.
Пред да отпочне гласањето се препорачува темелно чистење и дезинфекција со средство кое делува на вируси или 70% разреден алкохол.
Граѓаните или гласачите тој ден се обврзани да носат маски или заштитни средства за носот и устата.
Граѓаните за да го реализираат правото на глас треба да чекаат ред, на дистанца од 1,5 до два метри.
При самото влегување во внатрешниот простор прово лицето кое гласа ги дезинфицира рацете. При подавање на личната карта ја симнува накратко маската за идентификација и ја држи препорачата на дистанца од членовите на избирачкиот одбор.
Во избирачкото место не смее да има повеќе гласачи од бројот на гласачки кутии или паравани.
По завршеното гласање лицето кое гласа повторно ги дезинфицира рацете.
Членовите на ИО ја менуваат заштитната маска на секои 4 часа, додека ракавиците се менуваат при одење во тоалет и при пауза за јадење, стои во протоколот на Комисијата за заразни болести.
Комисијата во протоколот наведува дека гласачката кутија не треба да се дезинфицира после секој гласач.
Комисијата го прецизираше и начинот на кој што ќе гласаат заразените од Ковид – 19.
Во возилата во кои ќе се пренесува избирачкиот материјал треба да бидат присутни најмногу три лица, стои во протоколот. Со посебна заштитна опрема членовите на избирачките одбори ќе влегуваат во домовите на лицата кои се во изолација. Тие ќе носат мантил за еднократна употреба, ракавици за еднократна употреба, заштитна стандардна хируршка маска и средство за дезинфекција. Лицето кое гласа задолжително носи маска преку нос и уста.




