Започна судскиот процес против Љубомир Видојковиќ, кој пред една година со возило „хонда“ ја прегази Фросина Цековска на пешачки премин на булеварот „Партизански одреди“ во Скопје.
Основното јавно обвинителство бара осудителна пресуда. Според обвинителството Видојевиќ се товари дека сторил две кривични дела и тоа за тешки дела против безбедноста на луѓето и имотот во сообраќајот од член 300 во врска со член 297 ст.1 и кривично дело неукажување помош на лице повредено во сообраќајна незгода од член 301 од Кривичниот законик.
Во судницата по воведните зборови на Обвинителството, на осомничениот и неговиот бранител, се пристапи кон изведување на предложените докази.
Од страна на Обвинителството до Основниот суд доставени се предлог докази во насока на потврдување на основаноста на поднесениот обвинителен акт.
Предложени се докази по однос на утврдување на идентитетот на сторителот, како и докази по однос на релевантни околности од кои Судот ќе може да се увери и надвор од секое разумно сомневање ќе донесе осудителна пресуда со која обвинетиот ќе го огласи виновен за кривичните дела за кои се товари, информираат од Од Основен суд 1 Скопје.
Во текот на главната расправа ќе бидат презентирани неколку вештачења за сторените конкретни пропусти во сообраќајот како што е неприлагодена и неприспособена брзина и утврдениот процентот на алкохол кај сторителот во моментот на случување на сообраќајната несреќа и судско медицински извештај од обдукцијата на починатата Фросина Цековска, од кои ќе може да се утврди причинско-последичната врска на сообраќајната несреќа со смртниот исход. Освен ова, предложено е и испитување на сведоци, очевидци на настанот.
На судењето обвинетиот се бранел дека поминал на зелено светло за што неговиот бранител изјавил дека има видео снимки кои не ги добиле од безбедносните камери.