Во резиденцијата на амбасадорот на САД попладнево започна нова рунда партиски преговори, каде што пристигнаа претставници на сите четири партии.
На денешната средба нема да присуствува ЕУ амбасадорот Аиво Орав, кој е на консултации во Брисел, туку еден од неговите заменици.
Преговорите се закочени околу ингеренциите на министерот за внатрешни во преодната влада, но и датумот на негово повлекување.
Вицепремиерот и министер за здравство Никола Тодоров кој ја преставува ВМРО-ДПМНЕ на меѓупартиските разговори, претходно денеска изјави дека дека очекува да биде постигнат договор на денешната средба.
– Се разговара за ингеренциите на министерот за внатрешни работи и за тоа до кога министрите предложени од опозицијата ќе бидат во Владата. ВМРО-ДПМНЕ бара доколку СДСМ изгуби на изборите, нивните министри за внатрешни работи и за труд и социјална политика и дополнителните заменици-министри да се повлечат веднаш после изборите, а доколку победи за тоа нема потреба. ВМРО – ДПМНЕ бара оневозможување на масовни партиски промени во МВР односно да нема масовни партиски чистки во МВР, изјави Тодоров.
Што се однесува до ингеренциите на министерот за внатрешни работи, Тодоров демантираше дека ВМРО – ДПМНЕ бара ресорниот министер предложен од СДСМ да нема никакви ингеренции.
На новинарско прашање дали се возможни избори на 11 декември, Тодоров изрази надеж дека ќе има, но смета дека СДСМ е очајно, бега од договор, како што рече, со цел да избега од избори.
Љупчо Николовски член на Извршниот одбор на СДСМ вчера изјави дека позициите на СДСМ остануваат исти, непроменети и после внатрепартиски консултации викендов.
– Се надевам дека ќе се дојде до договор после вразумувањето на другите учесници во целиот овој процес, особено на ВМРО-ДПМНЕ, рече Николоски.
За спорот околу ингеренциите на министерот за внатрешни работи, Николовски нагласи дека, согласно законите во Македонија и законот за Влада, со министертвата раководат министрите и не може да се прави исклучок со МВР да раководи некој друг.
– Цврсто ќе стоиме на ставот дека министерот за внатрешни работи, за да ги сноси сите одговорности што ги има, ќе мора да ги има во целост сите овластувања, ингеренции што му се по закон. СДСМ од таа позиција нема да се помести, рече Николовски.
Партиите веќе постигнаа договор за избирачкиот список, за ад хок телото за контрола на медиумите и за главен и одговорен уредник на јавниот сервис.