Со изложбата на фотографии на Љупчо Илиевски МОТ (1984 – 1996), вечерва во 19 часот започнува 41то издание на Младиот отворен театар (МОТ) што ќе трае до 27 овој месец.
Љупчо Илиевски спаѓа во редот на најистакнати македонски фотографи. Припадник е на средната генерација фотографи кој негува специфичен уметнички стил и силен авторски печат. Засега е единствениот фотограф од Македонија чии фотографи за мегалитската опсерваторија Кокино, се објавени во српското издание на престижното специјализирано списание за фотографија National Geographic. Илиевски е автор на 9 самостојни изложби, присутен на повеќе филмски фестивали, а за својата работа е повеќе пати е наградуван.
Во 20.00 часот во МКЦ се игра претставата “Догвил“ во режија на Кокан Младеновиќ. Во претставата којашто е театарската адаптација на истоимениот филм на Ларс фон Трир меѓу другите играат и Бранислав Трифуновиќ и Милица Мајсторовиќ, а музиката за претставата во живо ја изведува Vrooom. Претставата е на Миксер Хаус Белград
Инаку претставата ја следи приказната на Грејс која бегајќи од гангстери, наоѓа засолниште во навидум идиличниот град наречен Догвил. Исфрустрираноста, тесноградоста и агресија на жителите на оваа идеализирана заедница бргу ќе излезат на виделина и Грејс ќе стане жртва на оние на кои таа сакаше да им помогне и во чија хуманоста и добрината веруваше.
На репертоарот на фестивалот се четиринаесет продукции од: Романија, Унгарија, Србија, Словенија, Хрватска, Косово, а гостува и еден од најреномираните европски театри, театарот од Види Лозана од Швајцарија.
МОТ оваа година учествува и во светската прослава на 100 години од смртта на Вилијам Шекспир, со ревијата на бесплатни играни филмови снимени по драми на Шекспир.
Публиката на закажаните проекции во Џебното кино во МКЦ ќе има можност да ги погледне легендарните наслови како ХАМЛЕТ на сер Лоренс Оливие, КРАЛОТ ЛИР на Питер Брук и мноштво други.
Во рамките на фестивалот како дополнителна програма, ќе се одржи и промоција на книгата РАПСОДИЈА НА ТЕАТАРОТ во издание на МОТ и МКЦ од францускиот филозоф, драматург и професор Алан Бадју.
Во изминативе 40 години на МОТ биле презентирани театарски групи театри, самостојни театарски уметници од над 70 земји од Европа и светот, со над 700 изведби.
Фестивалот значи многу за театарот и севкупниот културен живот во Скопје.