Министерството за информатичко општество, но и владејачката партија ВМРО ДПМНЕ во две одделни соопштенија испратија таканаречена реакција чиј предмет е повикот на Синдикатот на новинари и медиумски работници утре, на светскиот ден на слободен печат, порталите да ги затемнат 24 часа своите страници во знак на протест поради новиот закон за медиуми кој претендира да го регулира и интернет просторот.
Прва се јави партијата, а потоа и министерството. ВМРО ДПМНЕ го обвинува синдикатот дека е продолжена рака на СДСМ и дека
-Т.Н. Самостоен синдикат на новинари и медиумски работници, предводен од Тамара Чаусидис, очигледно е дека единствената своја самостојност ја има исклучиво во својот назив. На целата јавност во Македонија и е кристално јасно дека овој т.н. синдикат не е ниту самостоен, ниту независен. Тој од ден на ден станува се повидлив продолжеток на СДСМ за манипулација врз јавноста, пишува во соопштението на ВМРО ДПМНЕ.
-Г-ѓата Тамара Чаусидис и нејзините пријатели отфрлаат закон кој сеуште не е донесен, закон за кој што се спроведуваат сите најшироки и најтранспарентни постапки во неговото донесување. Во спроведување на постапката досега, а и од сега, се вклучени и ќе бидат вклучени, огромен број на луѓе, институции, организации, медиуми, а со нивните мислења сугестии, предлози и забелешки во континуитет се подобрува текстот на овој предлог закон. Овој т.н. синдикат отфрла предлог закон кој долг период се подготвува во целосна координација со експерти од Македонија и новинари, но и експерти од ЕУ, тврдат ВМРО ДПМНЕ.
Во реакцијата на Министерствот за информатичко општество се вели дека новиот закон за медиуми е правен согласно европските директиви, а тие ги отфрлаат сите забелешки на Синдикатот дека постои опасност од цензура на интернет.
-Министерството за информатичко општество и администрација уште еднаш потсетува дека во Нацрт-законот се вградени сите европски директиви (начела и дефиниции), кои претставуваат стандарди во европските земји.
Дезинформациите кои се пуштаат во јавноста преку одредени медиуми, како и повикот на
Самостојниот синдикат на новинари и медиумски работници до информативните веб-сајтови да ги „затемнат“ на еден час „во знак на протест поради опасните тенденции со нов закон за медиуми да се внесе информативен мрак на интернет“, само штетат на процесот на јавната расправа која е во насока на донесување на квалитетен Закон за медиуми, кој ќе ја подобри медиумската област во Република Македонија, се вели во реакцијата на Министерството за информатичко општество.